QR Parlamenti Senatynyń depýtaty Baqytjan Jumaǵulov jumys saparymen Aqmola oblysynyń Býrabai aýdanynda boldy, dep habarlaidy "Ult aqparat".
Sapar barysynda senator aldymen Shýche qalasyndaǵy №2 orta mektepte bolyp, bilim berý baǵytynda atqarylyp jatqan jumystarmen tanysty.
Óz kezeginde senator Baqytjan Jumaǵulov jaqynda qabyldanǵan «Pedagog mártebesi týraly» zań bilim berý salasy qyzmetkerleriniń quqyqtary men áleýmettik qorǵalýyn qamtamasyz etýmen qatar, elimizdegi pedagogika qaýymynyń mártebesin arttyrýǵa jáne muǵalim bedelin kóterýge baǵyttalǵanyn túsindirdi.
«Ustazdarymyz memlekettiń osyndai qoldaýyn úlken jaýapkershilikpen qabyldaýy tiis. «Pedagog mártebesi týraly» zańnyń odan ári jumys istep ketýi ózderińizge bailanysty. Ustazdar qalai ári qarai alyp ketedi?! Ustazdardyń ótkizip jatqan sabaqtary álemdik deńgeige sai bolýy kerek. Osyǵan úlken jaýapkershilikpen qarap jatqandaryńyz baiqalady», - dedi Baqytjan Jumaǵulov.
Sonymen qatar, senator Aqmola oblysy ákiminiń orynbasary Aina Mysyrálimovamen birge Shýche qalasyndaǵy joǵary tehnikalyq kolledji, joǵary pedagogikalyq kolledj tárizdi birqatar arnaiy orta bilim berý uiymdarynda bolyp, materialdyq-tehnikalyq jabdyqtalýyna nazar aýdardy. Kolledjdiń oqytýshylyq quramy jáne stýdenttermen kezdesip, jaǵdailaryn surap bildi. Senator pedagogtardyń quqyqtaryn keńeitý, aýyrtpalyqty azaitý, muǵalim qyzmetine qoiylatyn talaptardy kúsheitý, materialdyq emes yntalandyrý men materialdyq turǵyda qoldaý tetikterin egjei-tegjeili túsindirdi.
Osyndai kezdesý Býrabai aýdandyq jumyspen qamtý, halyqqa arnaiy áleýmettik qyzmet kórsetý ortalyqtarynda ótti. Kezdesýde jumys isteitin azamattarǵa áleýmettik járdemaqy tóleý, jumysqa ornalasý, asyraýshysynan aiyrylý, júkti bolýy men bosanýy jáne 1 jasqa deiingi bala kútimi jónindegi baptar egjei-tegjeili túsindirildi.
Ataýly áleýmettik kómek taǵaiyndaýda engizilgen ózgerister men bul baǵyttaǵy máseleler týraly Býrabai aýdandyq jumyspen qamtý ortalyǵynyń direktory Kenje Imanqulova aityp berdi.
