Ustazdar kúni qarsańynda alaiaqtar muǵalimderge arnalǵan syilyqtardy arzan baǵamen usynatyn jalǵan saittardy paidalana bastaǵan. Bul týraly Bas prokýratýranyń Quqyqtyq statistika jáne arnaiy esepke alý jónindegi komitetiniń Qylmystyq qaýip-qaterlerdiń jáne qoǵamdyq qaýipsizdik táýekelderin boljaý ortalyǵy eskertti, dep habarlaidy ult.kz.
Alaiaqtar azamattarǵa ustazdarǵa arnalǵan tiimdi syilyqtar týraly usynystar bar siltemeler jiberedi. Siltemege ótken kezde shynaiy internet-dúkenge uqsaityn jalǵan sait ashylady.
Qaskóiler mundai saittardaǵy taýarlardyń sýretterin jasandy intellekt kómegimen jasap, is júzinde joq ónimderdi usynýy múmkin. Al satyp alýshyǵa satýshynyń ornyna chat-bot jaýap beredi.
Nátijesinde azamat taýarǵa tólem jasaǵanymen, syilyqty almai, aqshasynan aiyrylýy múmkin. Bas prokýratýra buǵan deiin de alaiaqtardyń jalǵan saittar men jasandy intellekt tehnologiialaryn belsendi qoldanyp júrgenin eskertken.
Alaiaqtardan qalai qorǵanýǵa bolady?
Mamandar:
- kúmándi habarlamalardaǵy siltemelerge ótpeýge;
- belgisiz nómirlerge qońyraý shalmaýǵa;
- bank kartasynyń derekterin, CVV-kodty, PIN-kodty jáne SMS arqyly kelgen rastaý kodtaryn eshkimge bermeýge;
- satýshynyń senimdiligine kóz jetkizbei, aldyn ala tólem jasamaýǵa;
- tapsyrys týraly aqparatty dúkenniń resmi saity nemese qosymshasy arqyly ózdiginen tekserýge keńes beredi.
Eger azamat karta derekterin alaiaqtarǵa berip qoisa nemese shotynan kúmándi aqsha alynǵanyn baiqasa, dereý bankke habarlasyp, kartany buǵattaý jáne politsiiaǵa júginý qajet.
