ۇستازدار كٷنٸ قارساڭىندا الاياقتار مۇعالٸمدەرگە ارنالعان سىيلىقتاردى ارزان باعامەن ۇسىناتىن جالعان سايتتاردى پايدالانا باستاعان. بۇل تۋرالى باس پروكۋراتۋرانىڭ قۇقىقتىق ستاتيستيكا جەنە ارنايى ەسەپكە الۋ جٶنٸندەگٸ كوميتەتٸنٸڭ قىلمىستىق قاۋٸپ-قاتەرلەردٸڭ جەنە قوعامدىق قاۋٸپسٸزدٸك تەۋەكەلدەرٸن بولجاۋ ورتالىعى ەسكەرتتٸ, دەپ حابارلايدى ult.kz.
الاياقتار ازاماتتارعا ۇستازدارعا ارنالعان تيٸمدٸ سىيلىقتار تۋرالى ۇسىنىستار بار سٸلتەمەلەر جٸبەرەدٸ. سٸلتەمەگە ٶتكەن كەزدە شىنايى ينتەرنەت-دٷكەنگە ۇقسايتىن جالعان سايت اشىلادى.
قاسكٶيلەر مۇنداي سايتتارداعى تاۋارلاردىڭ سۋرەتتەرٸن جاساندى ينتەللەكت كٶمەگٸمەن جاساپ, ٸس جٷزٸندە جوق ٶنٸمدەردٸ ۇسىنۋى مٷمكٸن. ال ساتىپ الۋشىعا ساتۋشىنىڭ ورنىنا چات-بوت جاۋاپ بەرەدٸ.
نەتيجەسٸندە ازامات تاۋارعا تٶلەم جاساعانىمەن, سىيلىقتى الماي, اقشاسىنان ايىرىلۋى مٷمكٸن. باس پروكۋراتۋرا بۇعان دەيٸن دە الاياقتاردىڭ جالعان سايتتار مەن جاساندى ينتەللەكت تەحنولوگييالارىن بەلسەندٸ قولدانىپ جٷرگەنٸن ەسكەرتكەن.
الاياقتاردان قالاي قورعانۋعا بولادى?
ماماندار:
- كٷمەندٸ حابارلامالارداعى سٸلتەمەلەرگە ٶتپەۋگە;
- بەلگٸسٸز نٶمٸرلەرگە قوڭىراۋ شالماۋعا;
- بانك كارتاسىنىڭ دەرەكتەرٸن, CVV-كودتى, PIN-كودتى جەنە SMS ارقىلى كەلگەن راستاۋ كودتارىن ەشكٸمگە بەرمەۋگە;
- ساتۋشىنىڭ سەنٸمدٸلٸگٸنە كٶز جەتكٸزبەي, الدىن الا تٶلەم جاساماۋعا;
- تاپسىرىس تۋرالى اقپاراتتى دٷكەننٸڭ رەسمي سايتى نەمەسە قوسىمشاسى ارقىلى ٶزدٸگٸنەن تەكسەرۋگە كەڭەس بەرەدٸ.
ەگەر ازامات كارتا دەرەكتەرٸن الاياقتارعا بەرٸپ قويسا نەمەسە شوتىنان كٷمەندٸ اقشا الىنعانىن بايقاسا, دەرەۋ بانككە حابارلاسىپ, كارتانى بۇعاتتاۋ جەنە پوليتسيياعا جٷگٸنۋ قاجەت.
