Foto: ashyq derekkóz
Ýspen aýdandyq soty «Qýatty óńirler – el damýynyń draiveri» memlekettik baǵdarlamasy aiasynda bólingen biýdjet qarajatyn urlaý deregi boiynsha qylmystyq isti qarady, dep habarlaidy Ult.kz.
Qylmystyq isti tergeý aýdan prokýratýrasynyń bastamasymen júrgizilip, Pavlodar oblysy boiynsha «Eńbek mobildigi ortalyǵy» kommýnaldyq memlekettik mekemesiniń qyzmetine tekseris júrgizilgen. Tergeý nátijesinde Ýspen aýdany karerlik ortalyǵy filialynyń mamandary qonys aýdarýshylardy aldap, biýdjet qarjysyn zańsyz iemdengeni belgili boldy.
Baǵdarlamaǵa sáikes, qonys aýdarýshylarǵa turǵyn úi satyp alý qunynyń 50 paiyzy kóleminde tólem qarastyrylǵan. Bul rette eń joǵary tólem mólsheri 4 million teńgemen shektelgen. Alaida aiyptalýshylar jalǵan nusqaýlar berip, páterdi tómen baǵaǵa tabýdy talap etken. Al naqty satyp alý-satý sharttarynda úidiń quny eki ese qymbat — 8 million teńge dep kórsetilgen. Qonys aýdarýshylar qalǵan somany «baǵdarlama sharty aiasynda» dep kórsetip, aiyptalýshylarǵa qolma-qol bergen.
Nátijesinde alaiaqtyq jolmen memleket qarjysyn zańsyz iemdený shemasy qurylyp, memleketke 144 million teńge kóleminde zalal keltirilgen.
Qylmystyń aýyrlyǵy men memleketke keltirilgen shyǵyndy eskere otyryp, memlekettik aiyptaý sottan aiyptalýshylarǵa bas bostandyǵynan aiyrý túrindegi jaza taǵaiyndaýdy surady. Sot eki tulǵany kináli dep tanyp, birin 5 jylǵa bas bostandyǵynan aiyrdy, ekinshisine 3 jyl shekteý jazasyn belgiledi.
Úkim zańdy kúshine engen joq.
