Qazaqstanda avtojol salasyn reformalaý, jol qurylysynyń sapasyn arttyrý jáne memlekettik qarajattyń jumsalýyn baqylaýdy kúsheitý úshin úkimettik jumys toby quryldy. Tiisti ókimge Premer-ministr Oljas Bektenov qol qoidy, dep habarlaidy ult.kz.
Úkimettiń málimetinshe, jumys toby jol qurylysynyń qoldanystaǵy júiesin jáne sapany baǵalaý tásilderin qaita qaraidy. Sondai-aq qurylys standarttary men normalaryn jańartý, salany basqarýdyń jańa tetikterin engizý máseleleri qarastyrylady.
Reforma aiasynda tsifrlyq sheshimderdi paidalaný arqyly jol infraqurylymyn jaqsartý, memlekettik qarajattyń tiimdi ári ashyq jumsalýyn qamtamasyz etý kózdelgen.
Jumys tobyna Premer-ministrdiń birinshi orynbasary jetekshilik etedi. Onyń quramyna birqatar ministrliktiń basshylyǵy, Bas kólik prokýrorynyń orynbasary, «QazMunaiGaz», «QazAvtoJol» kompaniialarynyń, jol sapasyn baǵalaý jáne ǵylymi-zertteý uiymdarynyń ókilderi, sondai-aq sala sarapshylary men Quryltai depýtattary kirdi.
Oljas Bektenov jumys tobyna 2026 jylǵy 1 jeltoqsanǵa deiin avtojol salasyn túbegeili reformalaý jóninde usynystar ázirleýdi tapsyrdy. Usynystar zańnamalyq ózgeristerdi de qamtýy kerek.
