فوتو: اشىق دەرەككٶز
ۋسپەن اۋداندىق سوتى «قۋاتتى ٶڭٸرلەر – ەل دامۋىنىڭ درايۆەرٸ» مەملەكەتتٸك باعدارلاماسى اياسىندا بٶلٸنگەن بيۋدجەت قاراجاتىن ۇرلاۋ دەرەگٸ بويىنشا قىلمىستىق ٸستٸ قارادى, دەپ حابارلايدى Ult.kz.
قىلمىستىق ٸستٸ تەرگەۋ اۋدان پروكۋراتۋراسىنىڭ باستاماسىمەن جٷرگٸزٸلٸپ, پاۆلودار وبلىسى بويىنشا «ەڭبەك موبيلدٸگٸ ورتالىعى» كوممۋنالدىق مەملەكەتتٸك مەكەمەسٸنٸڭ قىزمەتٸنە تەكسەرٸس جٷرگٸزٸلگەن. تەرگەۋ نەتيجەسٸندە ۋسپەن اۋدانى كارەرلٸك ورتالىعى فيليالىنىڭ ماماندارى قونىس اۋدارۋشىلاردى الداپ, بيۋدجەت قارجىسىن زاڭسىز يەمدەنگەنٸ بەلگٸلٸ بولدى.
باعدارلاماعا سەيكەس, قونىس اۋدارۋشىلارعا تۇرعىن ٷي ساتىپ الۋ قۇنىنىڭ 50 پايىزى كٶلەمٸندە تٶلەم قاراستىرىلعان. بۇل رەتتە ەڭ جوعارى تٶلەم مٶلشەرٸ 4 ميلليون تەڭگەمەن شەكتەلگەن. الايدا ايىپتالۋشىلار جالعان نۇسقاۋلار بەرٸپ, پەتەردٸ تٶمەن باعاعا تابۋدى تالاپ ەتكەن. ال ناقتى ساتىپ الۋ-ساتۋ شارتتارىندا ٷيدٸڭ قۇنى ەكٸ ەسە قىمبات — 8 ميلليون تەڭگە دەپ كٶرسەتٸلگەن. قونىس اۋدارۋشىلار قالعان سومانى «باعدارلاما شارتى اياسىندا» دەپ كٶرسەتٸپ, ايىپتالۋشىلارعا قولما-قول بەرگەن.
نەتيجەسٸندە الاياقتىق جولمەن مەملەكەت قارجىسىن زاڭسىز يەمدەنۋ سحەماسى قۇرىلىپ, مەملەكەتكە 144 ميلليون تەڭگە كٶلەمٸندە زالال كەلتٸرٸلگەن.
قىلمىستىڭ اۋىرلىعى مەن مەملەكەتكە كەلتٸرٸلگەن شىعىندى ەسكەرە وتىرىپ, مەملەكەتتٸك ايىپتاۋ سوتتان ايىپتالۋشىلارعا باس بوستاندىعىنان ايىرۋ تٷرٸندەگٸ جازا تاعايىنداۋدى سۇرادى. سوت ەكٸ تۇلعانى كٸنەلٸ دەپ تانىپ, بٸرٸن 5 جىلعا باس بوستاندىعىنان ايىردى, ەكٸنشٸسٸنە 3 جىل شەكتەۋ جازاسىن بەلگٸلەدٸ.
ٷكٸم زاڭدى كٷشٸنە ەنگەن جوق.
