Memleket basshysy Almaty mańyndaǵy ushaq apatyna bailanysty keńes ótkizdi, dep habarlaidy Aqorda.
«Aqorda» rezidentsiiasynda Premer-Ministrdiń, Prezident Ákimshiligi basshylyǵynyń, Qaýipsizdik Keńesi hatshysynyń, Bas prokýrordyń, Ulttyq qaýipsizdik komiteti tóraǵasynyń, Ishki ister, Aqparat jáne qoǵamdyq damý, Densaýlyq saqtaý ministrleriniń qatysýymen Almaty áýejaiy mańyndaǵy jolaýshylar ushaǵynyń apatyna bailanysty shuǵyl keńes ótti.
Qasym-Jomart Toqaev Qazaqstan halqynyń jáne jeke óziniń atynan qaza bolǵan azamattardyń otbasylary men jaqyndaryna kóńil aitty. Jiynǵa qatysýshylar qaitys bolǵandardy bir minýt únsizdikpen eske aldy.
Memleket basshysy Premer-Ministr Asqar Maminniń, Bas prokýror Ǵizat Nurdáýletovtiń, Ishki ister ministri Erlan Turǵymbaevtyń jáne Densaýlyq saqtaý ministri Eljan Birtanovtyń esepterin tyńdady.
Qasym-Jomart Toqaev Úkimetke Almaty qalasy men Almaty oblysy ákimdikterimen birlesip qaza bolǵan azamattardyń otbasylaryna 4 million teńge kóleminde materialdyq kómek kórsetýdi tapsyrdy. Qaitys bolǵandardyń jaqyndaryna jan-jaqty psihologiialyq jáne meditsinalyq qoldaý kórsetiledi. Sonymen qatar zardap shekkenderdiń barlyǵyna qajetti kómek beriledi.
28 jeltoqsandy jalpyulttyq aza tutý kúni dep jariialaǵan Prezident elimizdegi memlekettik týlardy tómen túsirýge jáne barlyq oiyn-saýyq sharalaryn toqtatýǵa tapsyrma berdi.
Memleket basshysy keńes barysynda:
– Ushaq apatyna soqtyrǵan sebepterdi sapaly ári obektivti túrde tekserýge;
– «Qazaqstannyń aviatsiialyq ákimshiligi» aktsionerlik qoǵamyn bilikti mamandarmen qamtý jumystaryn tolyq aiaqtaý sharalaryn qabyldaýǵa;
– Qaýipsizdik talaptaryna sáikestendirý úshin barlyq áýe kompaniialarynyń jumystary men aviatsiialyq infraqurylym nysandaryn tekserýge tapsyrma berdi.
Bas prokýratýra men Ishki ister ministrligine qozǵalǵan qylmystyq is aiasynda ushaq apatyna soqtyrǵan sebepterdi anyqtaý, kinálilerdi zańǵa sáikes jaýapkershilikke tartý, sondai-aq, Almaty áýejaiynyń aýmaǵyna jaqyn ornalasqan jeke qurylystardyń zańdylyǵyn zertteý jóninde shara qabyldaýdy tapsyrdy.
Aita keteiik, búgin tańda Almatydan Nur-Sultan qalasyna ushyp shyqqan ushaq radardan joǵalyp ketti.
Keiin 95 jolaýshysy jáne 5 ekipaj múshesi bar ushaqtyń apatqa ushyraǵany málim boldy.
Oqiǵanyń mán-jaiyn anyqtaý úshin ushaq qulaǵan aýmaqqa arnaiy komissiia ushyp shyqty.
QR Prezidenti Qasym-Jomart Toqaev ushaq apatyna kináliler zańǵa sáikes qatań jazalanatynyn málimdedi.
Elbasy Nur-Sultan Nazarbaev jolaýshylar ushaǵynyń apatqa ushyraýyna bailanysty kóńil aitty.
