Bek Air áýe kompaniiasynda taǵy bir daý shyqty. Kompaniia qyzmetkerleri jumystarynyń toqtap turýyna bailanysty qaryzdaryn tólei almai, úisiz dalada qalamyz dep qorqyp otyr. Bul jaiynda Eýraziia birinshi arnasy habarlady.
Apatqa ushyraǵan áýe kemesiniń ekinshi bortserigi Murat Sahovtyń jary Shahnoz Sahova ai saiyn ipotekaǵa alǵan úiine 100 myń teńge kóleminde aqsha tóleidi. Apattan aman qalǵan kúieýiniń jumysy toqtap turýyna bailanysty jalǵyz ózi otbasyn asyrap otyr. Al onyń ailyǵy qaryzyn ai saiyn tólep otyrýǵa jetpeidi.
"Bárinen buryn úsh balamen kóshede qalamyn ba dep qorqamyn. Bul is uzaqqa sozylyp jatyr. Ári qarai da sozyla bermek. Sol sebepti el prezidentinen barlyǵynyń shapshań qimyldap, istiń tezirek bitýin suraimyn. Qansha sozýǵa bolady? Birese 20-sy, birese 30-yna deiin kútińder deidi. Al kompaniia tarapynan esh kómek kórsetilip jatqan joq", - deidi Shahnoz.
Sondai-aq, apatqa ushyraǵan ushaq ishinde bolǵan jolaýshylar da moraldyq jáne fizikalyq zaqym alǵany úshin kompaniia ótemaqy tóleidi dep dámeli. Zańgerlerdiń aitýynsha, apattan aman qalǵandardyń kóbi psihologiialyq turǵydan aýyr jaǵdaida, keibiri alǵan jaraqatynyń áserinen ómir boiy múgedek bolyp qalýy múmkin.
Esterińizge salaiyq, 27 jeltoqsan kúni tańerteń Almaty túbinde jolaýshylar ushaǵy apatqa ushyrady. Áýejaidan Nur-Sultanǵa ushyp shyqqan Fokker-100 kóp uzamai Talǵar aýdanyndaǵy eldi mekenge qulady.
Ushaq ishinde 93 jolaýshy, bes ekipaj múshesi bolǵan. Jolaýshylardyń tórteýi - sheteldik azamat. Qaiǵyly oqiǵadan 12 adam qaza tapty, bir ai ótken soń ekinshi ushqysh ta kóz jumdy.
