Senat Spikeri Máýlen Áshimbaevtyń tóraǵalyǵymen ótken Palata Biýrosynyń otyrysynda depýtattar aldaǵy jalpy otyrystyń kún tártibin talqylady jáne Májilisten kelip túsken zań jobalaryn komitetterge bólip berdi, dep habarlaidy "Ult aqparat".
Senattyń qaraýyna tórt zań jobasy kelip tústi. Olar: «Qazaqstan Respýblikasynyń Ulttyq qorynan 2020-2022 jyldarǵa arnalǵan kepildendirilgen transfert týraly» Qazaqstan Respýblikasynyń Zańyna ózgeris engizý týraly», «2020-2022 jyldarǵa arnalǵan respýblikalyq biýdjet týraly» Qazaqstan Respýblikasynyń Zańyna ózgerister men tolyqtyrýlar engizý týraly», «Qazaqstan Respýblikasynyń Ulttyq qorynan 2021-2023 jyldarǵa arnalǵan kepildendirilgen transfert týraly» jáne «2021-2023 jyldarǵa arnalǵan respýblikalyq biýdjet týraly» zań jobalary. Otyrys barysynda bul zań jobalary jumys úshin Qarjy jáne biýdjet komitetine berildi.
Senattyń kezekti jalpy otyrysy 29 qazanda ótedi. Onda depýtattar «Qazaqstan Respýblikasynyń Ulttyq qorynan 2020-2022 jyldarǵa arnalǵan kepildendirilgen transfert týraly» Qazaqstan Respýblikasynyń Zańyna ózgeris engizý týraly» zań jobasyn qaraidy. Sondai-aq, Palata otyrysynda Májilis maquldaǵan «2020-2022 jyldarǵa arnalǵan respýblikalyq biýdjet týraly» Qazaqstan Respýblikasynyń Zańyna ózgerister men tolyqtyrýlar engizý týraly» zań jobasy da qaralady.
Sonymen qatar Biýroda senatorlar osy aptada ótkiziletin basqa da is-sharalarǵa toqtalyp ótti. Onyń ishinde Ýchaskelik politsiia inspektorlarynyń mártebesin arttyrý jáne materialdyq-tehnikalyq qamtamasyz etilýin jaqsartý máselesi týraly, sondai-aq, Qaraǵandy oblysynyń óńirlik azamattyq qorǵanys júiesi máseleleri týraly Komitet otyrystaryna daiyndyq barysy pysyqtaldy.
Ótken aptada uiymdastyrylǵan aýyldyq aýmaqtardy damytý máselesine arnalǵan Parlamenttik tyńdaýdyń nátijesi boiynsha usynymdar qabyldanǵan edi. Senat Tóraǵasy Máýlen Áshimbaev sol usynymdardy Úkimetke joldap, olardyń iske asyrylýyn nazarda ustaýdy tapsyrdy.
