Bas prokýratýra ókilderi 3 oblys pen Almaty qalasynda júrgizilgen arnaiy aýqymdy operatsiia týraly aitty, dep habarlaidy QazAqparat.
«Qazirgi tańda 35 kúdikti, olardyń ishinde Qyrǵyzstan Respýblikasynyń úsh azamaty, keden organdarynyń, shekara qyzmetiniń laýazymdy tulǵalary, brokerler, deldaldar, sondai-aq uiymdasqan qylmystyq toptyń músheleri ustaldy. Sottyń sanktsiiasymen 33 tulǵa qamaýǵa alyndy. Arnaiy operatsiia aldynda uzaq jedel-jete tekserý júrgizildi», - dedi Bas prokýratýranyń resmi ókili Oksana Loskýtova.
Onyń aitýynsha, arnaiy shara barysynda memlekettik shekaranyń Qazaqstan-Qytai aimaǵynda ornalasqan Altynkól, Qaljat jáne Qorǵas keden beketteri, Qazaqstan-Qyrǵyzstan aimaǵynda ornalasqan Qordai men Qarasý beketteri men Qazaqstan-Ózbekstannyń Saryaǵash, Qazyǵurt, Atameken, Qaplanbek shekara aimaqtary arqyly halyq qoldanysyndaǵy taýarlardy kontrabandalyq tasymaldaý anyqtalyp, qujattalǵan.
«Atap aitqanda, Qazaqstanǵa kontrabandalyq taýarlar Qytaidan tikelei, sondai-aq Qyrǵyzstan arqyly kedendik ákimshileýdiń kóleńkeli syzbasyn, jalǵan qujattardy jáne tómendetilgen mólsher qoldanyla otyryp ákelingen. Kúdiktilerge kedendik rásimdeý jáne júkti alyp júrýdi qamtamasyz etetin kedendik organdar men shekara qyzmetiniń keibir laýazymdy tulǵalary kómek kórsetken. Taýarlar Qazaqstannyń iri qalalary men Resei Federatsiiasyna joldanyp otyrǵan. Memlekettik shekaranyń Qazaqstan-Ózbekstan aimaǵynda kedendik ótkizý beketteri arqyly taýarlardy ótkizýdi jyldamdatý úshin keden qyzmetkerleri para alyp otyrǵan. Kontrabandalyq is-árkettke qatysty tulǵalar iri kólemde aqshalai syiaqy berý jolymen arnaiy jáne quqyq qorǵaý organdary tarabynan «qamqorlyq» alýǵa árekettengen», - dedi ol.
Resmi ókildiń dereginshe, júrgizilgen is-sharalar barysynda barlyǵy 8 uiymdasqan qylmystyq toptyń zańsyz is-áreketterine tosqaýyl qoiyldy. Atalǵan derekter boiynsha ekonomikalyq kontrabanda, uiymdasqan top, qylmystyq uiym men transulttyq uiymdasqan top qurý jáne olarǵa basshylyq etý, sol siiaqty olarǵa qatysý jáne paraqorlyq faktileri boiynsha sotqa deiingi tergep-tekserý bastaldy.
«Sot sanktsiiasy negizinde 76 tintý júrgizilip, náijesinde edáýir somada ulttyq jáne shetel valiýtasynda aqshalai qarajattar, zergerlik buiymdar, quqyq beretin jáne býhgalterlik qujattar, kedendik deklaratsiialar alyndy. Kontrabandalyq júkter tielgen eki avtokóilk ustaldy. Aqsha qarajattary men basqa da materialdyq qundy zattardyń shyǵý kózderi sotqa deiingi tergep-tekserý barysynda tekserildi. Sotqa deiingi tergep-tekserý vedomstvoaralyq tergeý jedel tobymen júrgizilýde. Qylmystyq is Bas prokýrordyń baqylaýyna alyndy», - dedi Loskýtova.
