Almaty, Túrkistan, Jambyl oblystarynan bastaý alǵan «Alqaptan – sórege deiin» kooperatsiialyq tizbegi búkil respýblikada jalǵasyn tabady. Bul týraly Aýyl sharýashylyǵy ministri Saparhan Omarov málim etti, dep habarlaidy QazAqparat.
«Óziniń óndirgen ónimin, ásirise qiiar, alma, qyzanaq saqtaityn oryndar ońtústik óńirlerde jetkiliksiz. Sondyqtan Úkimet tarapynan eki túrli jumys júrgizilip jatyr. Birinshiden jeti oblysta kóterme-taratý ortalyqtarynyń jelisin salý máselesi kóterilýde. Ol kóterme-taratý ortalyqtarynyń negizgi mindeti – sharýalardan kelip túsken azyq-túlik taýarlaryn saqtaý, sodan keiin úlken kólemde satý», - dedi Saparhan Omarov OKQ-da ótken baspasóz máslihatynda.
Ministrdiń aitýynsha biyl Almaty, Túrkistan, Jambyl oblystarynda «Alqaptan – sórege deiin» degen aýyldaǵy kooperatsiialyq tizbekti damytý jumysy bastalǵan.
«Bul – saýda oryndary men sharýalardy qosyp, deldalsyz tikelei saýda jasaýǵa múmkindik jasaý. Biyl úsh oblysta júrip jatyr. Oǵan respýblikalyq biýdjetten qosymsha qarajat bólindi. Osy jyldyń aiaǵyna qarai tizbek jaqsy jumys isteitin bolsa, ol bastamany basqa da oblysta jalǵastyratyn bolamyz», - dedi ol.
