Ótken aptada Qazaqstan aýmaǵynda «Avtobýs» jedel aldyn alý is-sharasy ótkizildi. Bul týraly QR Ishki ister ministrliginiń ákimshilik politsiia komiteti tóraǵasynyń orynbasary Serik Túsipov aitty, dep habarlaidy QazAqparat.
«Is-sharanyń maqsaty – jolaýshylar kóliginiń qatysýymen orynalatyn jol apatyn azaitý, sonymen qatar júrgizýshilerdiń jolaýshy tasymaldaý erejesin saqtaýyna baqylaýdy kúsheitý. Politsiia kóliktik baqylaý qyzmetkerlerimen birge jolaýshylar tasymalymen ainalysatyn avtokólik kásiporyndary men kásipkerlerdi tekserdi. Avtobýstardyń tehnikalyq jai-kúii men júrgizýshilerdiń jol erejesin saqtaýǵa erekshe nazar aýdaryldy», - dedi ol ministrliktiń baspasóz qyzmeti alańynda ótken brifing barysynda.
Onyń aitýynsha, shara ótkizilgen 3 kúnniń ishinde qoǵamdyq kólik júrgizýshileri jasaǵan 9 050 jol júrisi erejesiniń buzylýy anyqtaldy.
Onyń ishinde avtobýsty mas kúide basqarýdyń - 11, joldyń qarsy betine shyǵyp ketýdiń - 14, manevr jasaý erejesin buzýdyń 1 606 faktisi anyqtaldy.
258 júrgizýshi jyldamdyqty belgilengen shekten asyrǵany úshin jaýapkershilikke tartyldy.
Sonymen qatar avtobýsty zańsyz qaita jabdyqtaýdyń - 262, reiske shyǵar aldynda tekserýden ótpeýdiń - 146, tehnikalyq tekserýden ótpeýdiń - 747, avtobýs júrgizip kele jatyp telefonmen sóilesýdiń 1 610 faktisi áshkerelendi.
«Jolaýshylardy zańsyz tasymaldaýdyń 120 faktisi anyqtaldy. Avtobýs parkteriniń 158 laýazymdy tulǵasy ákimshilik jaýapkershilikke tartyldy. Zańsyz 52 kólik turaǵy jabyldy», - dedi Serik Túsipov.
