ٶتكەن اپتادا قازاقستان اۋماعىندا «اۆتوبۋس» جەدەل الدىن الۋ ٸس-شاراسى ٶتكٸزٸلدٸ. بۇل تۋرالى قر ٸشكٸ ٸستەر مينيسترلٸگٸنٸڭ ەكٸمشٸلٸك پوليتسييا كوميتەتٸ تٶراعاسىنىڭ ورىنباسارى سەرٸك تٷسٸپوۆ ايتتى, دەپ حابارلايدى قازاقپارات.
«ٸس-شارانىڭ ماقساتى – جولاۋشىلار كٶلٸگٸنٸڭ قاتىسۋىمەن ورىنالاتىن جول اپاتىن ازايتۋ, سونىمەن قاتار جٷرگٸزۋشٸلەردٸڭ جولاۋشى تاسىمالداۋ ەرەجەسٸن ساقتاۋىنا باقىلاۋدى كٷشەيتۋ. پوليتسييا كٶلٸكتٸك باقىلاۋ قىزمەتكەرلەرٸمەن بٸرگە جولاۋشىلار تاسىمالىمەن اينالىساتىن اۆتوكٶلٸك كەسٸپورىندارى مەن كەسٸپكەرلەردٸ تەكسەردٸ. اۆتوبۋستاردىڭ تەحنيكالىق جاي-كٷيٸ مەن جٷرگٸزۋشٸلەردٸڭ جول ەرەجەسٸن ساقتاۋعا ەرەكشە نازار اۋدارىلدى», - دەدٸ ول مينيسترلٸكتٸڭ باسپاسٶز قىزمەتٸ الاڭىندا ٶتكەن بريفينگ بارىسىندا.
ونىڭ ايتۋىنشا, شارا ٶتكٸزٸلگەن 3 كٷننٸڭ ٸشٸندە قوعامدىق كٶلٸك جٷرگٸزۋشٸلەرٸ جاساعان 9 050 جول جٷرٸسٸ ەرەجەسٸنٸڭ بۇزىلۋى انىقتالدى.
ونىڭ ٸشٸندە اۆتوبۋستى ماس كٷيدە باسقارۋدىڭ - 11, جولدىڭ قارسى بەتٸنە شىعىپ كەتۋدٸڭ - 14, مانەۆر جاساۋ ەرەجەسٸن بۇزۋدىڭ 1 606 فاكتٸسٸ انىقتالدى.
258 جٷرگٸزۋشٸ جىلدامدىقتى بەلگٸلەنگەن شەكتەن اسىرعانى ٷشٸن جاۋاپكەرشٸلٸككە تارتىلدى.
سونىمەن قاتار اۆتوبۋستى زاڭسىز قايتا جابدىقتاۋدىڭ - 262, رەيسكە شىعار الدىندا تەكسەرۋدەن ٶتپەۋدٸڭ - 146, تەحنيكالىق تەكسەرۋدەن ٶتپەۋدٸڭ - 747, اۆتوبۋس جٷرگٸزٸپ كەلە جاتىپ تەلەفونمەن سٶيلەسۋدٸڭ 1 610 فاكتٸسٸ ەشكەرەلەندٸ.
«جولاۋشىلاردى زاڭسىز تاسىمالداۋدىڭ 120 فاكتٸسٸ انىقتالدى. اۆتوبۋس پاركتەرٸنٸڭ 158 لاۋازىمدى تۇلعاسى ەكٸمشٸلٸك جاۋاپكەرشٸلٸككە تارتىلدى. زاڭسىز 52 كٶلٸك تۇراعى جابىلدى», - دەدٸ سەرٸك تٷسٸپوۆ.
