Almatyda úsh balasymen birge terezeden sekirip, mert bolǵan áielge qatysty qylmystyq is toqtatyldy, dep habarlaidy QazAqparat.
Bul týraly Almaty qalalyq politsiia departamentiniń resmi ókili Saltanat Ázirbek málim etti.
«Atalǵan fakti Áýezov aýdany politsiia basqarmasynda qylmystyq kodekstiń 105-baby («ózin-ózi óltirýge deiin jetkizý») boiynsha tirkeldi. Keshendi tergeý sharalary júrgizildi. Nátijesinde qylmys quramynyń bolmaýyna bailanysty qylmystyq is toqtatyldy», - deidi S.Ázirbek.
Eske salaiyq, 2021 jyldyń qarashasynda «Jetisý» shaǵyn aýdanyndaǵy turǵyn úilerdiń birinde 28 jastaǵy áiel 2015, 2016 jáne 2019 jylǵy balalarymen birge 9-qabattan sekirip ketti. Áiel men eki balasy oqiǵa ornynda kóz jumdy. Taǵy bir bala jedel járdem kóliginde qaitys boldy.
