"Samuryq-Qazyna" qorynyń taza kirisi 2019 jyldyń birinshi toqsanynda 343 milliard teńge boldy, - dep habarlaidy ulttyq ál-aýqat qorynyń qoǵammen bailanys jáne marketingtik kommýnikatsiialar jónindegi departamenti.
"Samuryq-Qazyna" Ulttyq ál-aýqat qorynyń 2019 jyldyń birinshi toqsanyndaǵy taza kirisi ótken jyldyń osy kezeńimen salystyrǵanda 17,1 paiyzǵa ósip, 343 milliard teńge boldy. Bul týraly Qordyń Basqarma tóraǵasy Ahmetjan Esimovtyń qatysýymen ótken qordyń qorjyndyq kompaniialarynyń basshylarymen kezdesýi barysynda belgili boldy.
Osylaisha, 2019 jyldyń qańtar-naýryz ailarynda satýdan túsken túsimder men taza kiris 1 951 milliard jáne 343 milliard teńgeni qurady, alǵashqy úsh aida jospardyń oryndalýy sáikesinshe 95 paiyzdy jáne 188 paiyz boldy. Operatsiialyq paida (NOPLAT) aǵymdaǵy jyldyń úsh aiynda 240 milliard teńge boldy, bul 28 milliard teńgege nemese josparlanǵan mejeden 13 paiyzǵa artyq.
Qarjy kórsetkishteriniń ósýine áser etken negizgi faktorlar: munai ónimderin, gazdy, gaz kondensatyn satý kóleminiń jáne júk ainalymynyń artýy, poshta qyzmetteriniń kóbeiýi, affinajdalǵan altyn óndirýdiń aitarlyqtai ósýi. Sonymen qatar, Qordyń barlyq iri portfeldik kompaniialarynda taýar quny men jalpy ákimshilik shyǵyndar azaidy.
Taza tabystyń artýyna sonymen qatar "QazMunaiGaz" AQ tobyndaǵy qaýymdasqan kompaniialar men birlesken kásiporyndardan túsken kiris úlesiniń ulǵaiýy áser etti.
Aita ketken jón, 2018 jyldyń sáýirinde Elbasy Nursultan Nazarbaev "Samuryq-Qazyna" qorynyń 2018-2028 jyldarǵa arnalǵan jańa damý strategiiasyn bekitti. Memleket basshysy ulttyq ál-aýqat qory úshin mańyzdy mindetterdi qoidy, olardyń bastysy - qorjyndyq kompaniialardy tiimdi basqarý jáne olardyń kórsetkishterin álemdik balamalarymen teńestirý.
