Foto: egemen.kz
Memleket basshysynyń tapsyrmasyna sáikes, 2019 jyldan beri 1 millionnan astam oqýshyǵa arnalǵan 1200 mektep salyndy. Tek 2023–2024 jyldary 510 myń orynǵa arnalǵan 422 jańa mektep ashyldy, dep habarlaidy Ult.kz.
Osy sharalardyń nátijesinde elimizdegi úsh aýysymdy mektepterdiń sany 4 ese, apatty mektepterdiń sany 2 ese azaidy, al oqýshy oryndarynyń tapshylyǵy 4 ese qysqardy.
Memleket zamanaýi jáne qolaily bilim berý ortasyn qurý boiynsha júieli jumysty jalǵastyrýda. Jańa oqý jylynyń qarsańynda óńirlerde 115 myń oqýshyǵa arnalǵan taǵy 83 jańa mektep ashyldy, onyń 57-si "Keleshek mektepteri" ulttyq jobasy aiasynda salynǵan. Jańa mektepterdiń paidalanýǵa berilýi Shymkent, Almaty qalalarynda, Aqmola, Qaraǵandy jáne Qyzylorda oblystarynda úsh aýysymdy oqytý máselesin tolyǵymen joiýǵa múmkindik berdi.
Qazirgi ýaqytta elimizde 3000 mektep bir aýysymda, 5000-nan astam mektep eki aýysymda jumys isteidi. Jyl sońyna deiin 140 myń orynǵa arnalǵan taǵy 111 mekteptiń qurylysy aiaqtalady.
Joǵaryda atalǵan jobalardyń júzege asyrylýy elimizdiń kóptegen óńirlerinde úsh aýysymdy oqytýdy joiýǵa jáne qosymsha 150 myń oryn tapshylyǵyn qysqartýǵa múmkindik beredi.
2025–2026 oqý jylynda elimizde jalpy syiymdylyǵy 267 myń oqýshyǵa arnalǵan 232 jańa mektep salynady. Sonymen qatar 245 mektep jańǵyrtýdan ótedi, taǵy 1000 aýyl mektebi modernizatsiialanady, al 680 mektepke 1100 zamanaýi pándik kabinet ornatylady.
Respýblikalyq bilim berý uiymdarynyń infraqurylymy da jańartylýda. Túrkistandaǵy "Bilim-innovatsiia" litseiinde jáne Almatydaǵy Respýblikalyq fizika-matematika mektebinde jóndeý jumystary aiaqtaldy, Almatyda "Abai Ulttyq mektebi" jańa ǵimaraty qurylysynyń aiaqtalýy josparlanýda.
