Qostanai oblysynyń ákimi Arhimed Muhambetov mal urlyǵynyń aldyn alýǵa bailanysty atqarýshy organdarǵa tapsyrma berdi, dep habarlaidy QazAqparat tilshisi.
Mal urlyǵynyń dendep ketýi oblys turǵyndaryna aitarlyqtai qiyndyq týǵyzýda. Oblystyq IID bastyǵynyń orynbasary Bolatbek Jumaǵalievtiń aitýynsha, jyl basynan beri mal urlyǵymen ainalysyp júrgen 9 qylmystyq top ustalǵan. Olar 44 márte urlyq jasaǵan.
«Qańtar aiynan bastap óńirde 538 mal urlandy. Olardyń 215-i nemese 40 paiyzdaiy ielerine qaitaryldy. Qalǵan qylmystardyń betin ashý múmkin bolmai tur. Sondyqtan turǵyndarǵa ózderiniń túlikterine GPS-qurylǵy ornatýǵa keńes beremiz. Bul óte qymbat emes, qoljetimdi baǵada satylady», - dedi Bolatbek Jumaǵaliev.
Osy jyldyń qyrkúiek aiynda Denisov aýdanynyń Sinegorsk aýylynda «Prostory» JShS-na tiesili 47 jylqy urlandy. Shyǵyn kólemi - 8,4 mln teńge. Jedel-iz kesý sharalary barysynda jylqylardyń Reseige ótip ketkeni anyqtaldy. Urylar Cheliabi oblysynyń Varnenskii aýdanyna aidap alyp ketken. Osyndai jaǵdai Jangeldin aýdanynyń Qalam-Qarasý aýylynda da boldy. Aimaq basshysy Arhimed Muhambetov mal urlyǵyna atústi qaraýǵa bolmaitynyn aityp, jergilikti politsiia men atqarýshy bilik organdaryna tiisti sharalardy qabyldaý kerektigin tapsyrdy.
«Jalpy, shalǵai jatqan eldi mekenderdegi urlyq-qarlyq jergilikti atqarýshy biliktiń salǵyrttyǵynan bolady. Aýylda shoǵyrlanyp jatqan fabrika, zaýyttar joq. Basty kiris kózi - mal sharýashylyǵy. Jergilikti ákimder kez kelgen qojalyqtyń jaǵdaiyn biledi. Maldyń qai jerde jaiylatyny da anyq. Jańaǵy «Prostory» JShS-ny mysalǵa alaiyq. Shyǵyn kólemi 8,4 mln degenmen kelispeimin. Sebebi, sol urlanǵan jylqylardyń barlyǵy 200 myńnan turmaidy. Odan da qymbat. Taǵy da eskertemin, sharýa qojalyqtaryna GPS-qurylǵylardyń paidasyn túsindirińizder. Bul baǵytta politseilermen birigip, jumys isteý kerek. Mal urlyǵymen kúres baǵytyndaǵy is-sharalardy kúsheitińizder», - dep tapsyrdy ákim.
Oblysta Qostanai, Denisov, Áýliekól, Taran aýdandary men Arqalyq qalasynda mar urlyǵy kóbeigen. Qylmystyń aldyn alý sharalarynyń biri - chip ornatý. Mamandar mal sharýashylyǵy ielerine tańbalaýdyń dástúrli ádisterimen birge elektrondy chipti qoldanýǵa keńes beredi. Chippen qamtamasyz - etý maldyń sanyn baqylaý múmkindigi, sebebi chipti syrǵa sekildi alyp tastaý múmkin emes. Bir sózben aitqanda, bul - janýardyń pasporty. Iesi úiinde otyryp, túlikteriniń baǵyt-baǵdaryn baqylap otyrady.
