Qurmetti, Qazaqtyń múddesi úshin, keleshek urpaq úshin jumys jasap jatqan buqaralyq aqparat quraldary. Sonyń ishinde áleýmettik jelidegi toptar hám saittarǵa asa qaratyp otyrmyn.
Aqparattyq keńistikte tynystap jatqan azamat ókili retinde sizderge aitar datym bar. «Dat, taqsyr!» degende, sózime qulaq asyp, «Datyńdy ait!» der basshy bolsa.
«Zamanyń túlki bolsa, tazy bop qý» degen sóz bar. Túlki ailasyn asyrǵysy kelgen saiyn biz aldanyp qala berdik. Tazy – tektiliktiń ańy. Ony qor qylmas úshin oilaný kerek, sanaǵa salý kerek. Aitpaǵym - bul emes.
Qazir birneshe saittardyń halyq igili úshin dep arzan dúnieniń soiylyn soǵyp júrgenin jaqsy bilemin. «Halyqqa kerek dúnie - osy» degen arzan syltaýmen nan taýyp júrgen tilshilerdiń tóbesinen qaraityn súzgi bar ma?! Áitpese «súigenine qyzǵanyp, tósektes bolǵan jerinen ustap, áleýmettik jelige salyp jiberipti», «áielin jalańash kóshede júrgizip qoidy» degen sekildi anaiy taqyryptarmen halyqtyń kóńilinen shyǵý kimge kerek?
Áleýmettik jelide eńbektegen baladan eńkeigen kárige deiin otyrady. «Balapan uiada ne kórse, ushqanda sony iledi». Endeshe, balapanyń anaiy dúnieniń qurbany bolyp jatsa, onyń iletin dúniesi izgilikke, inabattylyqqa, mahabbatqa bastai ala ma?!
Sizderdiń basqa jazatyn dúnielerińiz joq pa?! Onsyz da saiasattyń kúl-talqanyn shyǵaryp jazyp ta, "mazaq" qylyp ta jatyrmyz, ara-tura eldiń hal-ahýalyna qatysty dúnieler berip júremiz. Bárine kóz juma qaradyq. «Intriga» týdyrý qazir - moda. Biraq intriga týdyram dep ulttyń saltynan aspaý kerek. Qazaqtyń dástúri, mentaliteti jabaiy dep júrseńizder, qatty qatelesesizder!
Atadan kele jatqan tárbie sep bop, erotikalyq taqyryptaǵy áńgimelerdiń úi ishinde de, úi syrtynda da ashyq aitylmaýy, úlkenderdiń balanyń kózinshe astarlap bolsyn sóz qylmaýy - tektilik. «Qazirgi balalar ishten bilip týǵan» deimiz. Joq! Eshkim ishten bilip týmaidy. Abai ony o basta aityp ketken. Úiretemiz. Kúiretemiz. Sosyn baryp kinálaimyz.
Urpaq sanasynyń jalańashtanyp ketýine sizderdiń berip otyrǵan «jalańash» aqparattaryńyz sebepker. Endigi áleýmettik jeliler, saittar arqyly janarlaryn jalańashtap alǵan urpaqty, bútindei sheshindirip almaiyq!
Asa qadirli, qazaq jýrnalisteri!
Qurmetti, sait basshylary!
«Jeti ret ólshep, bir ret kes» degen qazaqtyń sózi bar. Qas-qaǵym sáttiń ishinde halyqtyń aldyna shyǵyp ketetin árbir aqparatqa mán bere otyryp, súzgi jasasańyzdar. Sizdiń «bým» jasap taýyp júrgen nanyńyz, búkil bir ulttyń urpaǵyn ýlandyrýy múmkin.
Tósektiń áńgimesin ósektiń oshaǵyn ainaldyrmai, qaita osy dúniemen kúresseńizder. Urpaq ósip keledi!
Qurmetpen, Marǵulan AQAN
