قۇرمەتتٸ, قازاقتىڭ مٷددەسٸ ٷشٸن, كەلەشەك ۇرپاق ٷشٸن جۇمىس جاساپ جاتقان بۇقارالىق اقپارات قۇرالدارى. سونىڭ ٸشٸندە ەلەۋمەتتٸك جەلٸدەگٸ توپتار ھەم سايتتارعا اسا قاراتىپ وتىرمىن.
اقپاراتتىق كەڭٸستٸكتە تىنىستاپ جاتقان ازامات ٶكٸلٸ رەتٸندە سٸزدەرگە ايتار داتىم بار. «دات, تاقسىر!» دەگەندە, سٶزٸمە قۇلاق اسىپ, «داتىڭدى ايت!» دەر باسشى بولسا.
«زامانىڭ تٷلكٸ بولسا, تازى بوپ قۋ» دەگەن سٶز بار. تٷلكٸ ايلاسىن اسىرعىسى كەلگەن سايىن بٸز الدانىپ قالا بەردٸك. تازى – تەكتٸلٸكتٸڭ اڭى. ونى قور قىلماس ٷشٸن ويلانۋ كەرەك, ساناعا سالۋ كەرەك. ايتپاعىم - بۇل ەمەس.
قازٸر بٸرنەشە سايتتاردىڭ حالىق يگٸلٸ ٷشٸن دەپ ارزان دٷنيەنٸڭ سويىلىن سوعىپ جٷرگەنٸن جاقسى بٸلەمٸن. «حالىققا كەرەك دٷنيە - وسى» دەگەن ارزان سىلتاۋمەن نان تاۋىپ جٷرگەن تٸلشٸلەردٸڭ تٶبەسٸنەن قارايتىن سٷزگٸ بار ما?! ەيتپەسە «سٷيگەنٸنە قىزعانىپ, تٶسەكتەس بولعان جەرٸنەن ۇستاپ, ەلەۋمەتتٸك جەلٸگە سالىپ جٸبەرٸپتٸ», «ەيەلٸن جالاڭاش كٶشەدە جٷرگٸزٸپ قويدى» دەگەن سەكٸلدٸ انايى تاقىرىپتارمەن حالىقتىڭ كٶڭٸلٸنەن شىعۋ كٸمگە كەرەك?
ەلەۋمەتتٸك جەلٸدە ەڭبەكتەگەن بالادان ەڭكەيگەن كەرٸگە دەيٸن وتىرادى. «بالاپان ۇيادا نە كٶرسە, ۇشقاندا سونى ٸلەدٸ». ەندەشە, بالاپانىڭ انايى دٷنيەنٸڭ قۇربانى بولىپ جاتسا, ونىڭ ٸلەتٸن دٷنيەسٸ ٸزگٸلٸككە, يناباتتىلىققا, ماحابباتقا باستاي الا ما?!
سٸزدەردٸڭ باسقا جازاتىن دٷنيەلەرٸڭٸز جوق پا?! ونسىز دا ساياساتتىڭ كٷل-تالقانىن شىعارىپ جازىپ تا, "مازاق" قىلىپ تا جاتىرمىز, ارا-تۇرا ەلدٸڭ حال-احۋالىنا قاتىستى دٷنيەلەر بەرٸپ جٷرەمٸز. بەرٸنە كٶز جۇما قارادىق. «ينتريگا» تۋدىرۋ قازٸر - مودا. بٸراق ينتريگا تۋدىرام دەپ ۇلتتىڭ سالتىنان اسپاۋ كەرەك. قازاقتىڭ دەستٷرٸ, مەنتاليتەتٸ جابايى دەپ جٷرسەڭٸزدەر, قاتتى قاتەلەسەسٸزدەر!
اتادان كەلە جاتقان تەربيە سەپ بوپ, ەروتيكالىق تاقىرىپتاعى ەڭگٸمەلەردٸڭ ٷي ٸشٸندە دە, ٷي سىرتىندا دا اشىق ايتىلماۋى, ٷلكەندەردٸڭ بالانىڭ كٶزٸنشە استارلاپ بولسىن سٶز قىلماۋى - تەكتٸلٸك. «قازٸرگٸ بالالار ٸشتەن بٸلٸپ تۋعان» دەيمٸز. جوق! ەشكٸم ٸشتەن بٸلٸپ تۋمايدى. اباي ونى و باستا ايتىپ كەتكەن. ٷيرەتەمٸز. كٷيرەتەمٸز. سوسىن بارىپ كٸنەلايمىز.
ۇرپاق ساناسىنىڭ جالاڭاشتانىپ كەتۋٸنە سٸزدەردٸڭ بەرٸپ وتىرعان «جالاڭاش» اقپاراتتارىڭىز سەبەپكەر. ەندٸگٸ ەلەۋمەتتٸك جەلٸلەر, سايتتار ارقىلى جانارلارىن جالاڭاشتاپ العان ۇرپاقتى, بٷتٸندەي شەشٸندٸرٸپ المايىق!
اسا قادٸرلٸ, قازاق جۋرناليستەرٸ!
قۇرمەتتٸ, سايت باسشىلارى!
«جەتٸ رەت ٶلشەپ, بٸر رەت كەس» دەگەن قازاقتىڭ سٶزٸ بار. قاس-قاعىم سەتتٸڭ ٸشٸندە حالىقتىڭ الدىنا شىعىپ كەتەتٸن ەربٸر اقپاراتقا مەن بەرە وتىرىپ, سٷزگٸ جاساساڭىزدار. سٸزدٸڭ «بۋم» جاساپ تاۋىپ جٷرگەن نانىڭىز, بٷكٸل بٸر ۇلتتىڭ ۇرپاعىن ۋلاندىرۋى مٷمكٸن.
تٶسەكتٸڭ ەڭگٸمەسٸن ٶسەكتٸڭ وشاعىن اينالدىرماي, قايتا وسى دٷنيەمەن كٷرەسسەڭٸزدەر. ۇرپاق ٶسٸپ كەلەدٸ!
قۇرمەتپەن, مارعۇلان اقان
