Aqtóbe oblysynda buryn kolledjde oqytýshy bolǵan 38 jastaǵy er adam dini alaýyzdyq qozdyrý jáne terrorizmdi nasihattaý baptary boiynsha sottaldy. Sot ony kináli dep tanyp, 5 jylǵa bas bostandyǵynan aiyrý jazasyn taǵaiyndady, dep habarlaidy ult.kz.
Belgili bolǵandai, er adam buryn fizika men matematika pánderinen sabaq bergen, sondai-aq Atyraý politehnikalyq kolledjinde oqytýshy qyzmetin atqarǵan. Sońǵy jyldary ol Mártók aýdanynda turǵan.
Tergeý derekterine sáikes, ol dini taqyryptaǵy pikirlerin resmi dini oryndarda emes, qurylys nysandarynyń birinde aityp, jergilikti turǵyndarmen sóilesken. Arnaiy dini bilimi bolmasa da, islamdy óz túsinigi boiynsha túsindirýge tyrysqan.
Alaida onyń kózqarastary ýaqyt óte radikaldy sipat alyp, ózge din ókilderine qarsy zorlyqty aqtaityn mazmunǵa aýysqan. Sondai-aq ol qarýly dini toptar qurý ideiasyn alǵa tartyp, zorlyq-zombylyq áreketterin qoldaityn pikirler bildirgeni aityldy.
Sot materialdaryna sáikes, onyń túsiniginde hristiandar, býddister, shiitter men sopylyq baǵyt ókilderi «qarsy tarap» retinde qarastyrylǵan.
Sot barysynda aiyptalýshy radikaldy ideialardyń yqpalynda bolǵanyn moiyndap, kinásin tolyq moiyndaǵan jáne úkimge shaǵymdanbaitynyn aitqan. Sonymen birge tórt balasy bar ekenin alǵa tartyp, jeńil jaza suraǵan.
Sot ony QR QK 174-baby 1-bóligi jáne 256-baby 1-bóligi boiynsha kináli dep tanyp, 5 jylǵa bas bostandyǵynan aiyrdy.
Aiyptalýshynyń aitýynsha, dini qyzyǵýshylyǵy namaz oqityn stýdentterdiń áserinen bastalyp, keiin internet arqyly túrli materialdardy qarap júrgen.
