Urlanǵan qarýlardyń áli tolyq tabylmaýy qańtar oqiǵasy tyńǵylyqty josparlanǵanyn kórsetedi. Májilistiń jalpy otyrysynda depýttardyń suraqtaryna jaýap bergen QR Ishki ister ministri Marat Ahmetjanov osyndai pikir bildirdi, dep habarlaidy QazAqparat tilshisi.
Depýtat Irina Ýnjakova Ishki ister ministrinen qańtar oqiǵasy kezinde urlanǵan qarýdyń qalǵan bóligin tezdetip tabý úshin qandai sharalar qabyldanyp jatqanyn surady.
«Shynymen de, búginde, ókinishke qarai, 2000-nan astam qarý áli tabylǵan joq. Muny naqty aitýymyz kerek. Men taǵy da azamattarymyzǵa qaiyrylǵym keledi. Ishki ister ministrligi zańǵa súiene otyryp, qarýdy óz erkimen tapsyrǵan adamdardy ákimshilik, qylmystyq isterge tartpaý týraly kepildik beredi. Osy 2000-nan astam atys qarýy tabylmai jatqany, jasyrýly jatýy qańtar oqiǵasy aldyn ala josparlanǵanyn aiǵaqtaidy. Árine, ol qarýlar qazir bizdiń turǵyndarǵa shynymen qaýip tóndiredi. Sondyqtan Ishki ister ministrligi «Qarý» atty arnaiy operatsiia júrgizip jatyr. Oǵan jeke quramnyń 10 myń qyzmetkeri jumyldyrylǵan», - dedi ministr.
Aitýynsha, bul baǵyttaǵy jumystar jedel tergeý baǵytynda ǵana emes, el arasynda túsindirý baǵytynda da júrip jatyr.
«Túsindirý jumystary jemisin berip jatqanyn aitý kerek. Mysaly, Almaty oblysyndaǵy aýyldardyń birinde turǵyndar qarý satpaq bolǵan qylmyskerlerdi ózderi ustap, urlanǵan qaýlarymen birge politsiiaǵa tapsyrdy. Qazir ol adamdar qamaýda. Olardyń basqa da birqatar qylmys jasaǵany belgili boldy», - dedi Marat Ahmetjanov.
