Mýnktyń týyndysyndai 100 jyl boiy «aiqailap» turǵan kartina kezdese bermeidi. Óner tarihynda mundai tanymaldyq «Mona Lizada» ǵana bar shyǵar. Onymen qoimai, jyl ótken saiyn oǵan qatysty jańa boljamdar men pikirler kóbeiip, sheshimi joq jumbaqqa ainalyp barady. Tipti, ony «Qarǵys atqan kartina» deitinder de bar.
Dybys beinelengen kartina
Negizgi keiipker beinesiniń qupiiasy áli kúnge ashylmai keledi. Sýretshi ony maqsat etpese kerek. Ol ónersúier qaýymǵa alǵash ret 1893 jyldyń jeltoqsanynda Berlinde ótken kórmede tanystyrylǵan týyndyda beine emes, dybystyń ózi ǵana bar syńaily.
Amerika metrologiialyq qoǵamynyń jýrnalynda jariialanǵan maqalada, Mýnktyń kúndeligindegi mynadai sóilemge silteme berilgen:
«Men serýendep júrip qandy qyzyl bulttar men aspandaǵy órtti kórdim. Sol kúni qatty sharshaǵan edim, sharbaqqa súiengen kúii qoiý qara ford pen qala ústindegi qubylysqa sileiip qarap tura berdim. Dostarym áldeqashan uzap ketken bolatyn. Tabiǵat- Ananyń aiqaiynan denem túrshigip, kóńilimdi qorqynysh bilep aldy».
Ómiriniń sońǵy 15 jylynda sýretshi jumys istei almady. Onyń oń kóziniń shyryshty aǵynynan qan ketýine bailanysty, kórý qabiletiniń nasharlaýy sebep boldy. 1940 jyly natsistik Germaniia Norvegiiany basyp alǵan kezde, Mýnktyń boiyn qaitadan úrei bilep aldy. 1944 jyly sol úrei men aiqaidyń jeteginde dúnieden ozdy.
Qoldan qolǵa ótip júrgen jeke kollektsiiadaǵy nusqasy 2012 dyly 2 mamyrda bássaýdaǵa qoiylǵanǵa deiin milliarder Petter Olsenniń qorynda bolǵan edi. Keiin ony Leon Blek esimdi azamat 119 million 922 myń 500 dollarǵa satyp alyp, sol jylǵa deiingi eń qymbat óner týyndysy retinde rekord jańartqan edi.
HH ǵasyrdyń ekinshi jartysynda «Aiqai» naǵyz «ikonalyq» keskinge ailandy.
Beisenǵazy Ulyqbek
Qazaqstan Jýrnalister Odaǵynyń múshesi
