Qazaq tilin úiretýge arnalǵan Steppe Rider bilim berý oiynyn ázirleýge jumsalǵan 242 mln teńgege qatysty tekserý bastaldy. Bul týraly Ǵylym jáne joǵary bilim ministri Saiasat Nurbek málimdedi, dep habarlaidy ult.kz.
Búgin Úkimet otyrysynan keiin ótken brifingte ministrden qomaqty qarjyǵa ázirlengen oiynnyń nátijesine ministrlik qanshalyqty kóńili tolatyny suraldy.
Saiasat Nurbektiń aitýynsha, tekseris júrgizýge ministrliktiń ózi bastamashy bolǵan.
«Bul másele boiynsha tekserý júrgizý týraly QR UQK-niń Sybailas jemqorlyqqa qarsy is-qimyl qyzmetine jáne Astana qalasy boiynsha Ekonomikalyq tergep-tekserý departamentine ótinim joldadyq», – dedi ministr.
Onyń málimetinshe, qazirgi tańda tiisti tergeý amaldary júrgizilip jatyr. Tekserý nátijesi boiynsha sheshim qabyldanady.
«Osydan keiin tiisti sheshim jariialanady dep oilaimyn. Bul másele tekserýshi organdardyń quzyretine jatady», – dedi Saiasat Nurbek.
Ǵylym jáne joǵary bilim ministrligi Til saiasaty komitetiniń málimetinshe, Steppe Rider – qazaq tilin oiyn arqyly úiretýge baǵyttalǵan joba. Onda ranner jáne viktorina elementteri biriktirilgen.
Oiyn barysynda paidalanýshy qar barysymen birge saiahattap, túrli tapsyrmalardy oryndaidy, áripter men sózderdi jinap, jańa taqyryptar men deńgeilerdi ashady.
