Qazaqstandaǵy Uly Otan soǵysyndaǵy Jeńistiń 75 jyldyǵy tolǵan kúni erekshe oqiǵamen bastaldy. 1942 jyldyń qazan aiynda Smolensk túbindegi shaiqasta qaza tapqan qazaq sarbazynyń máiiti əskeri bortpen elordalyq aviatsiialyq bazasyna búgin tańerteń jetkizildi, dep habarlaidy "Ult aqparat" QR Qorǵanys ministrliginiń baspasóz qyzmetine silteme jasap.
Áskeri qyzmetshiniń máiiti sáýir aiynyń basynda Smolensk oblysynyń Temkin aýdanynda izdeý-barlaý ekspeditsiiasyn júrgizý kezinde tabyldy. Qaitys bolǵan jaýyngerdiń saqtaýly qalǵan medali arqyly aty-jóni anyqtaldy. Belgisiz jaýynger Qaraǵandy oblysy Shet aýdany Jasterek aýylynyń týmasy Medet Amanjolov bolyp shyqty. Soǵys aldynda ol áskerge shaqyrylyp, 1941 jyly 24 jasynda maidanǵa attanady. Onyń sońǵy qyzmet orny 125-shi jeke atqyshtar brigadasy boldy.
Jaýyngerdiń týystary əli kúnge deiin Shet aýdanynda turady. 1942 jyly otbasy Medet Amanjolov Smolenskini qorǵaýda erlikpen qaza bolǵany týraly hat aldy. Kóptegen jyl boiy urpaqtary onyń jerlengen jerin tabýǵa tyrysqan. Mine, 78 jyldan keiin jaýynger Otanyna oraldy.
Soǵysta qaza tapqan jaýyngerdiń otbasy jerleý ornyna barǵysy kelgenmen, tótenshe jaǵdaiǵa bailanysty bul múmkin bolmady. Qazaq jaýyngerleriniń súiekterin otanyna qaitarýǵa áskeri aviatsiia kúshteri qol jetkizdi. Jaqyn arada Shet aýdanynyń Aǵadyr ziratynda jaýyngerdi áskeri qurmetpen qaita jerleý úshin týystaryna beriletin bolady.
