Karantin shekteýlerine bailanysty álem boiynsha 168 millionnan asa bala bir jyl boiy mektepke barmaǵan. Sondai-aq 214 mln-ǵa jýyq oqýshy kúndizgi oqýdyń úsh toqsanyna qatyspaǵan, dep habarlaidy "Ult aqparat" IýNISEF-tiń resmi saityna silteme jasap.
Álemniń 14 eliniń mektepteri negizinen 2020 jyldyń naýryzy men 2021 jyldyń aqpany aralyǵynda jabyq boldy. Bul elderdiń úshten ekisi Latyn Amerikasy men Karib basseini elderi aimaǵynda ornalasqan. Saldarynan 98 mln oqýshynyń sabaǵyn toqtatýyna týra keldi. Mektepter, ásirese Panama, Salvador, Bangladesh pen Boliviiada uzaǵyraq jabyq bolǵan.
«Kúndizgi oqýǵa bara almaityn oqýshylar kún saiyn mektep baǵdarlamasynan qalyp bara jatyr. Biz taǵy bir jyl shekteý bolǵanyna jáne osy balalardyń taǵy da kúndizgi oqýsyz júrýine jol bere almaimyz. Mektepterdiń jumysyn jandandyrý úshin bar kúshimizdi jumsaýymyz qajet», - dep málimdedi IýNISEF-tiń atqarýshy direktory Genrietta For.
IýNISEF-tiń sońǵy deregine sáikes, qazirgi kúni mektepterdiń tolyq nemese ishinara jabylýyna bailanysty álemde 888 mln-nan asa balanyń bilim alýy úzilip qalyp jatyr.
