Foto: SGB
Dúniejúzilik densaýlyq saqtaý uiymy (DDSU) Ózbekstanda balalardyń ólimine ákep soqtyrǵan Úndistan preparattarynyń qaýiptiligi týraly eskertti, dep habarlaidy QazAqparat agenttigi uiymǵa silteme jasap.
Másele Úndistanda Marion Biotech LTD farmatsevtikalyq kompaniiasy shyǵarǵan Ambronol jáne DOK-1 Max shárbattary týraly bolyp otyr.
DDSU bul ónimder sapa standarttaryna sáikes kelmeitinin aitýda. Sebebi osy ýaqytqa deiin óndirýshi atalǵan uiymǵa ónimderdiń qaýipsizdigi men sapasyna kepildik beretin qujattar usynbaǵan.
Ózbekstan Densaýlyq saqtaý ministrligi eki ónimniń úlgilerine zerthanalyq taldaý jasap, ekeýiniń quramynda ruqsat etilmeitin mólsherde dietilenglikol jáne/nemese etilenglikol bar ekenin anyqtady.
Bul dárilerdiń quramyndaǵy ýytty zattar áserinen ish aýyrý, qusý, diareia, zár shyǵarýdyń buzylýy, bas aýrýy, psihikalyq jaǵdaidyń ózgerýi jáne búirektiń ólimge ákeletin ótkir syrqaty bolýy múmkin.
DDSU atalǵan dárilerdiń basqa elderge nemese óńirlerge beiresmi naryq arqyly taralýy múmkin ekenin joqqa shyǵarmaidy.
DDSU tiisti meditsinalyq mekemelerdi qadaǵalaýdy kúsheitýge jáne jetkizilim tizbeginde saqtyq tanytýǵa, sondai-aq patsientterge ziian keltirmeý úshin osy sapasyz ónimderdi anyqtap, ainalymnan shyǵarýǵa shaqyrdy.
Eske salaiyq, Ózbekstanda ótken jyldyń qyrkúiek-jeltoqsan ailarynda 19 adamnyń ólimi tirkelgen edi. Oǵan úndilik Marion Biotech kompaniiasy shyǵarǵan DOK-1 Maks preparatyn qabyldaý sebep bolǵan. Zardap shekkenderdiń barlyǵy – alty jasqa tolmaǵan balalar.
7 qańtarda joǵaryda atalǵan siropty ishken taǵy bir balanyń qaitys bolǵany belgili boldy.
