Elordada ótip jatqan ShYU-ǵa múshe memleketter basshylary keńesiniń keńeitilgen otyrysynda Úndistan men Pákistan resmi túrde ShYU-ǵa múshe boldy, dep habarlaidy "Ult aqparat".
Elordanyń Táýelsizdik saraiyndaǵy uiym sammiti barysynda Memleket basshylary Úndistan men Pákistandy ShYU-ǵa qabyldaý protsesin aiaqtaý jáne múshe mártebesin berý týraly tarihi kelisimge qol qoidy.
«Búgin 2017 jyldyń 9 maýsymynda, Astanada tarihi oqiǵa boldy. Biz uiymyzǵa kirý úshin barlyq mindettemelerdi oryndaǵan eki jańa músheni - Úndistan Respýblikasy men Pákistan Islam Respýblikasyn qabyldadyq. Osylaisha, ShYU is júzinde ǵalamshar halqynyń negizgi bóligin óz quramyna qosý arqyly álemdik saiasat pen álemdik ekonomikanyń qozǵaýshy kúshine ainaldy. Ózimniń jáne sizderdiń attaryńyzdan tolyq quqyly múshe memleket retinde ShYU-ǵa kirýimen Narendra Modi men Mýhamad Navaz Sharifty quttyqtaýǵa ruqsat etińizder», - dedi Qazaqstan Prezidenti tarihi qujatqa qol qoiylǵannan keiin.
Aita keterligi, qol qoiý rásimine Úndistan Premer-Ministri Narendra Modi men Pákistan Islam Respýblikasynyń Premer-Ministri Mýhamad Navaz Sharif qatysty.
