Úndistan osy elde jaqynda koronavirýstyń órshýine qarsy turý úshin dostas Qazaqstan jibergen gýmanitarlyq kómekti joǵary baǵalady, dep habarlaidy "Ult aqparat" QR Syrtqy ister ministrliginiń baspasóz qyzmetine silteme jasap.
Osyǵan bailanysty, birqatar úndi kompaniialarynyń basshylyǵy Qazaqstannyń Niý-Delidegi Elshiligine óz hattaryn joldap, búkil álem úshin osyndai qiyn ýaqytta yntymaqtastyq pen qoldaý kórsetkeni úshin shynaiy rizashylyǵyn bildirdi.
«2021 jylǵy 13 jáne 14 mamyrda Qazaqstannan jetkizilgen meditsinalyq kómek kóptegen adamdardyń ómirin saqtap qalýǵa kómektesetini sózsiz. Úndister bul asyl isharatty árqashan este saqtaidy» dep kórsetilgen hatta.
Budan buryn habarlanǵandai, Niý-Deli áýejaiyna jalpy salmaǵy 40 tonnaǵa jýyq gýmanitarlyq kómek júgi bar eki qazaqstandyq áýe kemesi keldi. Onda densaýlyq saqtaý salasyndaǵy qazaqstandyq óndirýshi kompaniialardyń meditsinalyq maska, respirator, qorǵanys kostiými jáne ókpeni jasandy jeldetýdiń portativti apparattary bar.
Esterińizge sala keteiik, 2021 jylǵy 4 mamyrda Qazaqstan Prezidenti Qasym-Jomart Toqaev Úndistan Premer-Ministri Narendra Modige joldaý jibergen, onda «Úndistanda COVID-19 indetiniń qatty órshýine bailanysty qalyptasqan qiyn-qystaý kezeńde úndi eliniń qaiǵy-qasiretine ortaq ekenin jetkizgen» bolatyn.
Al 7 mamyrda Qazaqstan Úkimetine úndi tarapyna tiisti kómek kórsetýdi tapsyrdy.
Qazaqstan men Úndistandy eki el halyqtary arasyndaǵy dástúrli dostyq pen ózara janashyrlyq rýhynda strategiialyq áriptestik qatynastar biriktiretinin atap ótken jón.
