Búgin qazaq ádebietiniń kórnekti ókili, belgili satirik Kópek Ámirbek baqiǵa attandy. Jurtshylyq qalamger qazasyn aýyr qabyldady. Osy oraida belgili aqyn Baibota Qoshym-Noǵai jelidegi paraqshasynda marqummen sońǵy sóilesken sáti týraly estelik jariialady.
"O, jalǵan-ai! Jalǵannyń jalǵan ekeni ras eken! Kópen Ámir-Bek aǵamyz ómirden ozypty. Aǵamyzdy aldynan jarylqasyn! Otbasyna, aǵaiyn-týystaryna, ádebietsúier qaýymǵa, barsha qazaq halqyna kóńil aitamyn!
Almatyǵa joly túspei jatsa, Astanadan jii telefon soǵyp, birde óziniń aǵa ekenin eske alyp erkeletetin, birde «kýrstaryńnyń kúieý balasymyn ǵoi» dep kishireietin, birde quda ekenin aityp, syilap turatyn Kópen aǵam edi ol!
Budan bir aidan astam buryn tórt tomdyq shyǵarmalar jinaǵy jaryq kórgenin aityp qýanyp turdy. «Satyp alaiyn, poshta arqyly jiberińiz», – desem, «Jaqynda Almatyǵa baramyn. Sol kezde ala baramyn», – dep máz qylyp edi. Sońǵy ret eki apta buryn habarlasyppyz. Óziniń taiaýda ota jasatyp shyqqanyn, tamaqqa tábeti joq ekenin aityp, muńaiyp turdy. «Jaqsylap demalyńyz, em alyńyz, táýir bolyp ketesiz», – dep jubatqanmyn. Qarashanyń 1-i kúni telefon shalsam, jeńgemiz: «Aǵańyz aýyryp jatyr, sóilese almaidy», – deidi. Úmit úzgen joq edim. «Jaqsy, keiinirek habarlasamyn», – dep qoshtasqanbyz. Endi habarlasa almaimyz ǵoi...
Qashan da eldi kúlkige keneltip júretin Kópen aǵamyz aqyry kúlli qazaqty kúńirentip ketti!.." - dep jazdy ol Facebook paraqshasynda.
