Ulytaý oblysynyń ákimi Eset Baiken bastaǵan oblys ákimdiginiń delegatsiiasy «Qazaqmys» Tobynyń óńirdegi negizgi óndiristik, salynyp jatqan jáne áleýmettik nysandaryn aralady. Óńir basshysymen «Qazaqmys korporatsiiasy» JShS Basqarma tóraǵasy Rýslan Óskenáli jáne kompaniianyń beiindi baǵyttarynyń basshylary birge júrdi.
Sapar baǵdarlamasyndaǵy alǵashqy óndiristik nysan Batys Jezqazǵan kenishiniń №67 shahtasy boldy. Munda oblys ákimine ken óndirýdiń tehnologiialyq úderisi, zamanaýi jerasty tehnikasynyń jumysy jáne ónerkásiptik qaýipsizdiktiń qoldanystaǵy standarttary tanystyryldy.
Budan keiin delegatsiia «Qazaqmys Barlaý» JShS-nyń burǵylaý alańyna bardy. Munda Basqarma tóraǵasynyń orynbasary – geologiialyq barlaý jónindegi bas operatsiialyq direktor Ǵalym Nurjanov zamanaýi burǵylaý qondyrǵylarynyń jumysymen tanystyryp, kompaniianyń geologiialyq barlaý baǵdarlamasynyń iske asyrylý barysy týraly baiandady. Búginde Ulytaý oblysynda óńirdiń mineraldyq-shikizat qoryn tolyqtyrýǵa baǵyttalǵan aýqymdy geologiialyq barlaý baǵdarlamasy júzege asyrylýda. Baǵdarlama aiasynda 50 myń qýma metrden astam aýmaqqa burǵylaý jumysyn júrgizý josparlanǵan.
Sapar barysynda oblys ákimi Sátbaev qalalyq aýrýhanasy janynan salynyp jatqan jańa travmatologiialyq pýnkttiń qurylysymen tanysty. Jańa nysan qala turǵyndary men kásiporyn jumyskerleri úshin shuǵyl meditsinalyq kómektiń qoljetimdiligi men sapasyn arttyrýǵa múmkindik beredi. Nysandy paidalanýǵa berý 2027 jylǵa josparlanǵan.
Osydan soń delegatsiia Sátbaev qalasyndaǵy Kenshi dańqy alańyna baryp, júrgizilip jatqan jóndeý jáne abattandyrý jumysymen tanysty. Jańartylǵan alań kenshiler eńbegine kórsetilgen qurmettiń belgisi retinde qala turǵyndarynyń basyn qosatyn zamanaýi qoǵamdyq keńistikke jáne túrli mádeni-kópshilik is-shara ótetin orynǵa ainalmaq.
Sapar baǵdarlamasy boiynsha taǵy bir nysan salynyp jatqan geologiialyq klaster boldy. «Qazaqmys» ókilderi «Ulytaý ýniversiteti» KEAQ vitse-rektory Dármen Tashatovpen birge taý-ken salasyna joǵary bilikti maman daiarlaýǵa baǵyttalǵan zamanaýi ǵylymi-bilim berý bazasynyń jobasyn tanystyrdy.
Budan keiin oblys ákimi NAMYS sport kesheninde bolyp, nysannyń qyzmetimen jáne balalar men jasóspirimder sport akademiiasyn ashý josparymen tanysty. Quny 8,1 mlrd. teńgeni quraityn joba aiasynda aýdany 5 myń sharshy metrden asatyn, 150-200 tárbielenýshige arnalǵan zamanaýi keshen salý kózdelgen. Akademiianyń ashylýy 2026 jyldyń qyrkúiek aiyna josparlanǵan.
Osydan soń óńir basshysy «Jastar» saiabaǵyn qaita jańǵyrtý jumysymen tanysty. Quny 4,9 mlrd. teńgeni quraityn joba aiasynda jaiaý serýendeý jáne velosiped joldary, sýburqaq pen zamanaýi balalar oiyn alańdary salynyp, kógaldandyrý jumysy júzege asyrylady. Qazirgi ýaqytta demontaj jumysy aiaqtalyp, abattandyrýdyń negizgi kezeńine daiyndyq júrgizilýde. Qaita jańǵyrtý jumysyn 2026 jyldyń qazan aiynda aiaqtaý kózdelip otyr.
Sapar qorytyndysynda taraptar Ulytaý oblysynda ónerkásip, geologiialyq barlaý, áleýmettik infraqurylym, densaýlyq saqtaý jáne bilim berý salalaryn damytý jónindegi yntymaqtastyqty odan ári jalǵastyrýǵa nietti ekenderin rastady.
