Áleýmettik jelide uly tarapynan qorlyq kórgeni aitylǵan qariianyń jaǵdaiy qoǵamda keńinen talqylanǵan bolatyn. Belgili bolǵandai, qart qazir ózge uldarynyń qolyna baryp, qaýipsiz jerde turyp jatyr, dep habarlaidy ult.kz.
Aqsaqaldyń aitýynsha, úide júrgen kezinde oǵan qysym kórsetilip, tipti túnde ájethanaǵa shyǵýyna da múmkindik berilmegen.
«Mańdaiymnan salyp qaldy. Túnde kishi dáretke barǵym kelip, shyǵaiyn desem, taǵy aiqailaidy. “Barmaisyń, qaida?” deidi. Sol kezde ájethananyń janyndaǵy sórede ine-jip salatyn quty bolatyn. Ishinde qaishy bar edi. Sony alyp qashyp ketýge árekettendim», – deidi qariia.
Qariianyń aitýynsha, jubaiy ómirden ótkennen keiin týystary qara shańyraqqa sirek keletin bolǵan. Sebebi úidegilerdiń sýyq qabaǵynan keiin olarmen aralasý birtindep úzilgen.
Eske salaiyq, buǵan deiin Atyraý oblysy Qyzylqoǵa aýdanynyń Saryózek aýylynda turatyn egde jastaǵy turǵynǵa qatysty zorlyq-zombylyq bolýy múmkin degen aqparat qoǵamda úlken alańdaýshylyq týdyrǵan edi.
Jergilikti turǵyndardyń sózinshe, aýyl turǵyny Edilhan Sisenov uzaq ýaqyt boiy óz ákesine kúsh kórsetken bolýy múmkin. Qazirgi ýaqytta qariia týǵan qaryndasynyń, keiinnen nemereleriniń qolyna barǵan.
Aýyl turǵyndary qarttyń denesinde kógergen izder baryn, júrip-turýy qiyndaǵanyn jáne densaýlyǵynyń nasharlaǵanyn aitady. Jaqyndarynyń málimetinshe, qariianyń aqyl-esi durys, alaida uzaq ýaqyt kórgen qysym onyń densaýlyǵyna keri áser etýi múmkin.
