Túrkistanda qazaqtyń aty ańyzǵa ainalǵan boksshysy, Olimpiada chempiony Bekzat Sattarhanov atyndaǵy sporttyq keshenniń ǵimaraty qiraýdyń az-aq aldynda tur, dep habarlaidy Sputnik agenttigi Otyrar saityna silteme jasap.
Sporttyq keshen 2000 jyly ashylǵan. Qazir ǵimarat jumys istep turǵanymen, ondaǵy sport mektebine sportshy Ábdisalam Nurmahanovtyń esimi berilipti.
Túrkistan qalasyna kire bergende Bekzat Sattarhanovtyń eskertkishi janynda ornalasqan sport kesheni ashylǵaly beri birde-bir ret durystap jóndelmegen eken. Sport mektebi direktorynyń orynbasary jaqynda jóndeimiz, aqsha bólingen deidi, alaida jumystyń qashan bastalatyny beimálim.
"Biz munda respýblikalyq jarystar ótkizemiz. Keremet deńgeide bolmasa da, uiymdastyryp júrmiz. Kelesi jyly naýryzda jóndeý jumystary bastalady. Qujattary daiyn, 300 million teńge bólingen, qosymsha ǵimarattar salý josparda bar. Óz kúshimizben edenderin aýystyryp, kabinetter jasaǵanbyz", — deidi Nurmahanov atyndaǵy sport mektebi direktorynyń orynbasary Tólenbek Asanov.
Marqum boksshynyń ákesi Seiilhan Sattarhanov telefon arqyly bergen suhbatynda osy jaǵdaiǵa bailanysty ókpe-renishin jasyrmady.
"Bekzat Olimpiada chempiony bolǵan kezde bul ǵimarat bar bolatyn. Qazir syrtynda Bekzattyń aty jazylyp tur, al ishindegi mektep basqa sportshynyń atymen atalady, bul ǵimaratta balama qatysty eshteńe joq. Mýzeide turǵan medalderi túpnusqa emes, bári ózimizde. Ulymyzdy umytty, eshkim esine almaidy, ol týraly bir aýyz jaqsy sóz aitpaidy. Ǵimaratty jóndeý týraly aitpai-aq qoiaiyn, ózderi jaýap bersin. Bekzattyń qurmetine jaqsy, zamanaýi ǵimarat salsa da bolar edi, Qazaqstannyń namysyn qorǵap, eldiń atyn shyǵardy emes pe? Bekzattai boksshy eshqashan bolmaǵan siiaqty kórinedi. Osynyń bárin aitý maǵan ońai emes, aita-aita jaýyr bolsa da, esh nátije joq", — dep Seiilhan Sattarhanov renishin bildirdi.
Aita ketsek, sporttyq keshenge eldi mekenderden myńdaǵan oqýshy barady eken, ujymdaǵy burynǵy 50 bapkerdiń qataryna jańadan 40 adam qosylǵan.
Túrkistan oblysy dene shynyqtyrý jáne sport basqarmasy málimet bergendei, jóndeý jumystary 2019 jyly bastalady, ol úshin oblystyq biýdjetten 7 million teńge bólingen.
