Bir sultan bas ýázirin shaqyryp alyp:
-Meniń memleketimde qansha aqyn bar?-dep surapty.
-Júz aqyn bar,-dep jaýap beripti bas ýázir.
-Olar ne jazyp júr?
-Ómir, mahabbat, ǵylym-bilim, joryqtar týraly. Kópshiligi Sizdi madaqtap, birazy ǵaibattap jazyp qoiady.
-Olardyń ishindegi naǵyz aqyny nesheý?
-Álbette, Sizdiń ataq-dańqyńyzdy kelistirip jyrlaǵandary naǵyz aqyn bolady da! Jartysynan kóbi!..
-Men osy turǵanda maqtaǵanǵa jaqsy bop, dattaǵanǵa jaman bolyp ketpespin. Sondyqtan, búginnen bastap, búkil aqyndy birin qaldyrmastan zyndanǵa tasta!- dep ámir beripti sultan.
Aitty – bitti! Onyń pármeni qolma-qol oryndalady.
Bir jyl ótkende sultan ýázirinen taǵy surapty:
-Qane, meniń aqyndarymnyń jaǵdaiy qalai eken? Otyr ma? Qanshasy jazyp jatyr?
-Bári otyr. Ishterinde qyńyr-qyrsyq on ápendi ǵana jazýyn áli qoiar emes. Qalǵandary qysymǵa, qapas pen qamaýǵa shydamai jazýdy doǵardy,- depti ýázir.
-Endeshe, solardyń bárin bosatyp jiber, al ishindegi jazýyn qoimaǵan álgi on aqyndy alyp qalyp, árqaisysyna syi-siiapat kórsetip, jeke-jeke saltanatty saraiǵa ornalastyryp, barlyq jaǵdaiyn jasa!- dep ámir etipti sultan.
Aitty – bitti! Onyń pármeni qolma-qol oryndalady.
Taǵy bir jyl ótkende ol bas ýázirinen:
-Meniń aqyndarym qalai? Endi qanshasy óleń jazýyn jalǵastyryp jatyr eken?– dep surapty.
-Úsh-aq aqyn qaldy. Qalǵany jaqsy turmystan toǵaiyp, masairap, jazbai ketti,- dep jaýap beripti ýázir.
-Endeshe, mine - naǵyz Aqyn sol úsheýi. Taýqymetke jasymaǵan, marapatqa tasymaǵan sol úsh aqyndy ardaqtap, jazǵany men aitqanyna qulaq asyńdar! -degen eken sonda sultan.
Ulyqbek Esdáýlettiń jazbasynan
