بٸر سۇلتان باس ۋەزٸرٸن شاقىرىپ الىپ:
-مەنٸڭ مەملەكەتٸمدە قانشا اقىن بار?-دەپ سۇراپتى.
-جٷز اقىن بار,-دەپ جاۋاپ بەرٸپتٸ باس ۋەزٸر.
-ولار نە جازىپ جٷر?
-ٶمٸر, ماحاببات, عىلىم-بٸلٸم, جورىقتار تۋرالى. كٶپشٸلٸگٸ سٸزدٸ ماداقتاپ, بٸرازى عايباتتاپ جازىپ قويادى.
-ولاردىڭ ٸشٸندەگٸ ناعىز اقىنى نەشەۋ?
-ەلبەتتە, سٸزدٸڭ اتاق-داڭقىڭىزدى كەلٸستٸرٸپ جىرلاعاندارى ناعىز اقىن بولادى دا! جارتىسىنان كٶبٸ!..
-مەن وسى تۇرعاندا ماقتاعانعا جاقسى بوپ, داتتاعانعا جامان بولىپ كەتپەسپٸن. سوندىقتان, بٷگٸننەن باستاپ, بٷكٸل اقىندى بٸرٸن قالدىرماستان زىندانعا تاستا!- دەپ ەمٸر بەرٸپتٸ سۇلتان.
ايتتى – بٸتتٸ! ونىڭ پەرمەنٸ قولما-قول ورىندالادى.
بٸر جىل ٶتكەندە سۇلتان ۋەزٸرٸنەن تاعى سۇراپتى:
-قانە, مەنٸڭ اقىندارىمنىڭ جاعدايى قالاي ەكەن? وتىر ما? قانشاسى جازىپ جاتىر?
-بەرٸ وتىر. ٸشتەرٸندە قىڭىر-قىرسىق ون ەپەندٸ عانا جازۋىن ەلٸ قويار ەمەس. قالعاندارى قىسىمعا, قاپاس پەن قاماۋعا شىداماي جازۋدى دوعاردى,- دەپتٸ ۋەزٸر.
-ەندەشە, سولاردىڭ بەرٸن بوساتىپ جٸبەر, ال ٸشٸندەگٸ جازۋىن قويماعان ەلگٸ ون اقىندى الىپ قالىپ, ەرقايسىسىنا سىي-سيياپات كٶرسەتٸپ, جەكە-جەكە سالتاناتتى سارايعا ورنالاستىرىپ, بارلىق جاعدايىن جاسا!- دەپ ەمٸر ەتٸپتٸ سۇلتان.
ايتتى – بٸتتٸ! ونىڭ پەرمەنٸ قولما-قول ورىندالادى.
تاعى بٸر جىل ٶتكەندە ول باس ۋەزٸرٸنەن:
-مەنٸڭ اقىندارىم قالاي? ەندٸ قانشاسى ٶلەڭ جازۋىن جالعاستىرىپ جاتىر ەكەن?– دەپ سۇراپتى.
-ٷش-اق اقىن قالدى. قالعانى جاقسى تۇرمىستان توعايىپ, ماسايراپ, جازباي كەتتٸ,- دەپ جاۋاپ بەرٸپتٸ ۋەزٸر.
-ەندەشە, مٸنە - ناعىز اقىن سول ٷشەۋٸ. تاۋقىمەتكە جاسىماعان, ماراپاتقا تاسىماعان سول ٷش اقىندى ارداقتاپ, جازعانى مەن ايتقانىنا قۇلاق اسىڭدار! -دەگەن ەكەن سوندا سۇلتان.
ۇلىقبەك ەسدەۋلەتتٸڭ جازباسىنان
