Ulybritaniia jáne Kanada syrtqy ister ministrleri Taýly Qarabaqtaǵy “iri áskeri qimyldarǵa” alańdaýshylyq bildirip, qaqtyǵysty tez arada toqtatýǵa shaqyrdy.
“Kanada jáne Ulybritaniia Taýly Qarabaqtyń qaqtyǵys aimaǵynda bolyp jatqan iri áskeri qimyldar jaily aqparatqa qatty alańdaidy. Eldi mekenderge shabýyl jasaý jáne beibit azamattardyń qaza bolǵany jaily habarlamalar qatty alańdatyp otyr. Áskeri qimyldardy doǵaryp, atysty toqtatý týraly kelisim sharttaryn qurmettep, azamattardyń ómirin saqtaýǵa shaqyramyz” delingen málimdemede.
Oǵan Ulybritaniia syrtqy ister ministri Dominik Raab pen Kanada syrtqy ister ministri Fransýa Filipp Shampan qol qoiǵan.
Raab pen Shampan sonymen birge Eýropadaǵy qaýipsizdik jáne yntymaqtastyq uiymynyń Minsk protsesi aiasynda kelissóz júrgizýdi qoldaitynyn da bildirgen.
Buǵan deiin BUU bas hatshysy Antonio Gýterrish te Ázerbaijan men Armeniia basshylaryn áskeri qimyldy toqtatýǵa shaqyrǵan bolatyn. Gýterrish eki tarapty kelissóz ústeline otyrýǵa úgittep, aimaqqa EQYU baqylaýshylaryn jiberý usynysyn qoldaýǵa úndegen.
29 qyrkúiekte BUU Qaýipsizdik keńesiniń kezekten tys otyrysy ótedi. Onda Taýly Qarabaqtaǵy jaǵdai talqylanady.
Ońtústik Kavkazdaǵy turaqsyz Taýly Qarabaq aimaǵynda keiingi tórt jyl ishindegi eń iri qaqtyǵys 27 qyrkúiek kúni bastalyp, bul jaǵdaiǵa aimaqtaǵy derjavalar – Túrkiia men Resei nazar aýdarǵan. Eki tarap ta áskeri tikushaqtar, drondar, tankiler, artilleriia shyǵardy. Taýly Qarabaqtaǵy jaǵdai – Eýropada qazir eń uzaqqa sozylyp jatqan qaqtyǵys.
Eki memleket jaǵdaidyń ýshyǵýyna bir-birin kinálaidy. Seisenbige qaraǵan túni de qaqtyǵys aýmaǵynda atys bolyp, Erevan men Baký bir-birin shekara aýmaǵyn atqylady dep aiyptady. Sońǵy málimet boiynsha, eki jaqtan barlyǵy 91 sarbaz ben beibit turǵyn qaza bolǵan.
