ۇلىبريتانييا جەنە كانادا سىرتقى ٸستەر مينيسترلەرٸ تاۋلى قاراباقتاعى “ٸرٸ ەسكەري قيمىلدارعا” الاڭداۋشىلىق بٸلدٸرٸپ, قاقتىعىستى تەز ارادا توقتاتۋعا شاقىردى.
“كانادا جەنە ۇلىبريتانييا تاۋلى قاراباقتىڭ قاقتىعىس ايماعىندا بولىپ جاتقان ٸرٸ ەسكەري قيمىلدار جايلى اقپاراتقا قاتتى الاڭدايدى. ەلدٸ مەكەندەرگە شابۋىل جاساۋ جەنە بەيبٸت ازاماتتاردىڭ قازا بولعانى جايلى حابارلامالار قاتتى الاڭداتىپ وتىر. ەسكەري قيمىلداردى دوعارىپ, اتىستى توقتاتۋ تۋرالى كەلٸسٸم شارتتارىن قۇرمەتتەپ, ازاماتتاردىڭ ٶمٸرٸن ساقتاۋعا شاقىرامىز” دەلٸنگەن مەلٸمدەمەدە.
وعان ۇلىبريتانييا سىرتقى ٸستەر مينيسترٸ دومينيك رااب پەن كانادا سىرتقى ٸستەر مينيسترٸ فرانسۋا فيليپپ شامپان قول قويعان.
رااب پەن شامپان سونىمەن بٸرگە ەۋروپاداعى قاۋٸپسٸزدٸك جەنە ىنتىماقتاستىق ۇيىمىنىڭ مينسك پروتسەسٸ اياسىندا كەلٸسسٶز جٷرگٸزۋدٸ قولدايتىنىن دا بٸلدٸرگەن.
بۇعان دەيٸن بۇۇ باس حاتشىسى انتونيو گۋتەرريش تە ەزەربايجان مەن ارمەنييا باسشىلارىن ەسكەري قيمىلدى توقتاتۋعا شاقىرعان بولاتىن. گۋتەرريش ەكٸ تاراپتى كەلٸسسٶز ٷستەلٸنە وتىرۋعا ٷگٸتتەپ, ايماققا ەقىۇ باقىلاۋشىلارىن جٸبەرۋ ۇسىنىسىن قولداۋعا ٷندەگەن.
29 قىركٷيەكتە بۇۇ قاۋٸپسٸزدٸك كەڭەسٸنٸڭ كەزەكتەن تىس وتىرىسى ٶتەدٸ. وندا تاۋلى قاراباقتاعى جاعداي تالقىلانادى.
وڭتٷستٸك كاۆكازداعى تۇراقسىز تاۋلى قاراباق ايماعىندا كەيٸنگٸ تٶرت جىل ٸشٸندەگٸ ەڭ ٸرٸ قاقتىعىس 27 قىركٷيەك كٷنٸ باستالىپ, بۇل جاعدايعا ايماقتاعى دەرجاۆالار – تٷركييا مەن رەسەي نازار اۋدارعان. ەكٸ تاراپ تا ەسكەري تٸكۇشاقتار, دروندار, تانكٸلەر, ارتيللەرييا شىعاردى. تاۋلى قاراباقتاعى جاعداي – ەۋروپادا قازٸر ەڭ ۇزاققا سوزىلىپ جاتقان قاقتىعىس.
ەكٸ مەملەكەت جاعدايدىڭ ۋشىعۋىنا بٸر-بٸرٸن كٸنەلايدى. سەيسەنبٸگە قاراعان تٷنٸ دە قاقتىعىس اۋماعىندا اتىس بولىپ, ەرەۆان مەن باكۋ بٸر-بٸرٸن شەكارا اۋماعىن اتقىلادى دەپ ايىپتادى. سوڭعى مەلٸمەت بويىنشا, ەكٸ جاقتان بارلىعى 91 سارباز بەن بەيبٸت تۇرعىن قازا بولعان.
