Ulybritaniianyń kommýnikatsiia jónindegi agenttigi (Ofcom) qytailyq China Global Television Network (CGTN) telearnasyn litsenziiasynan aiyrdy. Ofcom zertteýi telearna kontentin litsenziiaǵa ie kompaniia emes, Qytai kommýnistik partiiasy baqylaitynyn anyqtaǵan.
Agenttik 4 aqpan kúngi habarlamasynda “aǵylshyn tildi halyqaralyq China Global Television Network telearnasy Ulybritaniianyń habar taratý zańyn buzǵany úshin litsenziiasynan aiyryldy” dep jazǵan.
"Bizdiń zertteýimiz China Global Television Network arnasynyń litsenziiasyna ie uiym baǵdarlamalarǵa redaktsiialyq baqylaý jasamaitynyn kórsetti. Biz China Global Television Network Corporation arnasyna litsenziia berý týraly ótinishti maquldai almaimyz, sebebi ony Qytai kommýnistik partiiasy baqylaidy, bul Ulybritaniianyń habar taratý zańyna qaishy" delingen agenttik habarlamasynda.
Agenttiktiń habarlaýynsha, Gonkongtegi demokratiiashyl belsendilerdiń narazylyǵynan obektivti aqparat taratpaǵany úshin qytailyq arnaǵa jaqyn arada taǵy bir sheshim shyǵýy tiis.
Sarapshylar bul sheshim Shyńjańdaǵy musylmandardyń lagerlerge qamalýy, Gonkongtegi dissidentterdiń qýdalanýy jáne Huawei tehnologiiasynyń qaýipsizdigi tóńireginde alańdaýshylyq bildirip júrgen Londonnyń Pekinmen aradaǵy onsyz da nasharlaǵan qatynasyn ýshyqtyryp jiberedi dep otyr.
