Búgin Qazaqstan Respýblikasy Investitsiialar jáne damý ministri Jeńis Qasymbek Ulybritaniia Birikken Koroldigi men Soltústik Irlandiianyń Saýda jáne investitsiialar ministri Greg Hendspen kezdesti, dep habarlaidy ministrliktiń baspasóz qyzmeti.
Kezdesý barysynda alda ótetin saýda-ekonomikalyq, ǵylymi-tehnikalyq, mádeni yntymaqtastyq jónindegi Qazaqstan-britan úkimetaralyq komissiiasynyń 4 otyrysy týraly, sondai-aq Qazaqstan men Ulybritaniia arasyndaǵy investitsiia, taý-ken, aýyl sharýalyshyǵy siiaqty perspektivaly baǵyttar boiynsha seriktestik ornatý jaiyn talqylady. «Men eki el arasyndaǵy qarym-qatynastyń jyl saiyn nyǵaiyp kele jatqandyǵyn erekshe atap ótkim keledi. Ulybritaniia - bizdiń Eýropadaǵy eń iri strategiialyq seriktesterimizdiń biri», dedi Jeńis Qasymbek.
Condai-aq, kezdesý barysynda Qytai-Qazaqstan-Ulybritaniia arasyn bailanystyratyn «Uly Jibek joly» ekonomikalyq beldeýin júzege asyrýda birlesip jumys atqarý úshin úshjaqty kelisim ornatý máselesi de sóz boldy.
Búginde Qazaqstan territoriiasy arqyly Qytai men Eýropanyń arasynda 15 tranzittik konteinerlik poiyz júredi. Ótken jyly «Qytai-Eýropa-Qytai» baǵytyndaǵy tranzittik konteinerler tasymaly 104,5 myńǵa jetip, 2015 jylmen salystyrǵanda eki esege artyp otyr (49,9 myń konteiner).
2017 jyly Chjetszian (QHR) - London (Ulybritaniia) baǵyty boiynsha alǵashqy júk konteinerlik poiyzy iske qosyldy. Endigi rette bul baǵyt boiynsha júkti týra 18 kún ishinde jetkizetin múmkindik týdy. Bul júk kemesine qaraǵanda qyzmetin 30 kún erte oryndaidy.
Búginde úkimetaralyq komissiia aiasynda bilim jáne ǵylym, energetika, taý-ken ónerkásibi baǵyttary boiynsha 4 jumys toby jumys isteidi.
Ulybritaniia - taýar ainalymy boiynsha Qazaqstannyń eń iri 10 seriktesiniń qataryna kiredi, sondai-aq, Qazaqstanǵa eń kóp investitsiia ákeletin úzdik alty eldiń qatarynda. Ulybritaniia sońǵy 12 jyl ishinde Qazaqstanǵa jalpy kólemi 12,1 mlrd. AQSh dollaryn quraityn tikelei investitsiia ákeldi (2005 jyldan 2017 jyldyń birinshi toqsanyna deiingi kórsetkish boiynsha tikelei investitsiia kólemi 12 278,2 mln. AQSh dollaryn quraidy). Bul - Qazaqstanǵa tartylǵan jalpy sheteldik investitsiianyń 5%.
Anyqtama úshin: 2017 jyldyń qańtar-sáýir ailary boiynsha Qazaqstan men Ulybritaniia arasyndaǵy taýar ainalymy 422,6 mln. AQSh dollaryn qurady. Bul 2016 jyldyń dál osy kezeńimen salystyrǵanda 26,6%-ǵa joǵary (333,7 mln. AQSh dollary).
