Foto: "Habar" telearnasy
Kúni keshe «Habar» telearnasynda Májilis sailaýyna qatysqaly jatqan partiialardyń tóraǵalary arasynda debat ótken bolatyn. Sol pikirsaiysta «Respýblika» partiiasynyń tóraǵasy Aidarbek Qojanazarovtyń halyq mádenieti men úlkender týraly aitqany qoǵamda qyzý talqylanyp jatyr.
Jańa partiianyń jetekshisi sóz arasynda «halyqtyń mádenieti joq» jáne «kári itti jańashyldyqqa úirete almaisyń» degendi aityp qaldy. Bul sózder qarapaiym halyqtyń da, qoǵam men mádeniet qairatkerleriniń de ashýyn týǵyzyp otyr.
Máselen, belgili jyrshy, Qazaqstannyń eńbek sińirgen qairatkeri Uljan Baibosynova da Qojanazarovtyń osynaý sózderine qatysty oiyn ashyq aitty.
«Óner men mádenietti álemge nasihattaý bul kúnde jyraýlyq ónerdegi missiiam retinde Parijdiń Theatre de la Ville Paris teatrynyń shaqyrýymen kúni erteń kontsert bergeli jatyrmyn. Bul - álem moiyndaǵan qazaq óneri men mádenietiniń bir ǵana kórinisi. Olai bolsa Qorqyt jáne Oǵyz dáýirinen jetken uly mádeniettiń urpaǵyn mádenietsiz dep tanýǵa qalai jol bermekshimiz!
Saq dáýirinen bastaý alatyn uly kóshpendiler mádenieti jáne san ǵasyrlyq tarihy bar mádeniet pen órkeniettiń jasaýshylary meken etken uly dala urpaqtaryn mádenieti joq dep tanýdy qalai túsinemiz?» - dep jazdy óner iesi óziniń Facebook-paraqshasynda.
Uljan Baibosynova «respýblikalyqtardy» Jańa Qazaqstan jasaýdy ata-baba tarihynan jetken qazaq dalasyndaǵy ádilettilik pen shynshyldyq ornatý dep túsinýge shaqyrdy.
