Elbasy Nursultan Ábishuly Nazarbaevtyń qarymdy qalamynan týǵan «Uly dalanyń jeti qyry» maqalasy Tuńǵysh Prezident kúni qarsańynda Túrkiianyń tórinde taldanyp, tarazylandy. Mazmundy maqala – kókeiimizdegi kóp jaittyń jaýabyn juptaǵan dúnie boldy. Qarymdy eńbek, aýqymdy baǵdarlama retinde joǵary baǵa alǵan maqala Qoja Ahmet Iasaýi atyndaǵy Halyqaralyq Qazaq-Túrik ýniversitetiniń Ókiletti Keńes basqarmasynyń muryndyq bolýymen ótken alqaly jiynda keńinen talqylandy. Anyǵynda, oqý ornyna ústimizdegi jyly basshylyqqa kelgen qos jetekshi – Bolatbek Abdrasilov pen Jengiz Tomar myrzalardyń Túrkiia Respýblikasyna jasaǵan saparlary Prezident maqalasyn talqylaýǵa oraily múmkindik boldy.
Ystambul qalasyndaǵy tórt birdei irgeli oqý oryndarynyń ǵalymdarynyń basyn qosyp, úlken oitalqynyń kórigin qyzdyrǵan basshylyq, Ankarada da aýyz toltyra aitarlyq jastar jiynyn uiymdastyrdy.
Q.A.Iasaýi atyndaǵy Halyqaralyq Qazaq-Túrik ýniversiteti Ókiletti Keńesiniń Tóraǵasy, professor Musa Iyldyz myrza basshylyq etken májilis maqalany mazmundy taldaýymen daralandy.
Maǵjan atamyz aitqandai, tolqynnan tolqyn týyp, tolymdy tolǵamdar tilge tiek, oiǵa ózek boldy. Musa Iyldyz myrza: «Nursultan Ábishuly áýeli «Qazaqstan – 2030» strategiiasyn túzdi. Sońyra ony «Qazaqstan – 2050» mejesimen nyǵaityp, «Máńgilik El» ideiasymen bekemdedi. Dúrkin-dúrkin mańyzdy maqalalary jaryq kórip turady. Men álemniń basqa jerinde mundai kemel kóshbasshyny kórgenim joq», - dep, salmaqty sóz saptady.
Ýniversitet prezidenti Bolatbek Serikbaiuly maqaladaǵy basty baǵyttardy baǵamdap, jastarǵa keńinen túsindirdi. Úzeńgiles basshy Jengiz Tomar myrza bolsa, Elbasy maqalasyndaǵy ideialardyń Iasaýi baba murasymen úndesip jatqanyn atap ótip, oqý ornymyzdyń atqaryp kele jatqan aýqymdy jumystarynyń kóbiniń maqalada tujyrymdy túrde kórinis tapqanyn jetkizdi.
Aǵa býyn ǵalymdar men jas izdenýshiler de maqalanyń mán-maǵynasyn alýan turǵyda taldap, ózindik kózqarastarymen úndestire otyryp, pikirlerin baiandady.
«Ozǵan el – tarihyn taspen jazady, tozǵan el – tarihyn jaspen jazady», - degen ataly sózben baǵamdaǵanda, maqalada qozǵalǵan tatymdy taqyryptar tarihi sananyń jańǵyrýyna dem beretini talqylaý jiyny barysynda airyqsha atap ótildi.
Májilis sońynda qadirmendi qonaqtarǵa bilimger Ankara jastary atynan Alǵys hattar tapsyrylyp, qurmet kórsetildi.
Elbasy maqalasy ǵylym maitalmandaryna tyń serpin berip, jastardyń ushqyr qiialyna qanat bitirdi.
Myrzahan Baijanuly,
Ankara Hajy Bairam Veli ýniversitetiniń doktoranty
.jpeg)