Astrahan aýdandyq mádeniet úiinde Aqmola oblystyq ardagerler keńesi tóralqasynyń kóshpeli seminary ótti.
Seminar jumysyna oblystyq ardagerler keńesiniń tóralqa músheleri, respýblikalyq ardagerler uiymy ortalyq keńesi tóraǵasynyń birinshi orynbasary Ó.Ozǵanbaev, Astrahan aýdanynyń ákimi N.Seiilov, Aqmola oblystyq ishki saiasat basqarmasynyń basshysy Ǵ.Shoikin, Aqmola oblystyq jumyspen qamtýdy úilestirý jáne áleýmettik baǵdarlamalar basqarmasynyń basshysy D.Ahmedjanova, Qazaqstan Respýblikasy Densaýlyq saqtaý ministrliginiń «Aqmola oblysy boiynsha taýarlardyń jáne qyzmetterdiń qaýipsizdigin baqylaý departamenti» bastyǵynyń orynbasary V.Zimov, Astrahan aýdany ákiminiń orynbasary J.Shahputova jáne oblystyq ardagerler keńesiniń ókilderi, aýdandyq, qalalyq ardagerler keńesiniń tóraǵalary men tóraiymdary qatysty.
Seminarda «Oblystyq ardagerler uiymdarynyń N.Nazarbaevtyń «Uly dalanyń jeti qyry» baǵdarlamalyq maqalasyn júzege asyrý jónindegi mindetteri týraly» Aqmola oblystyq ardagerler keńesiniń tóraǵasy Ǵosman Tóleǵul baiandama jasap, oblystyq ardagerler uiymdarynyń joǵaryda atalǵan maqalanyń qaǵidalaryn júzege asyrý jolyndaǵy atqaryp jatqan jumystarynyń nátijesin naqty dáleldermen kórsetip berdi. Ol óz sózinde:
– Bul maqalanyń jaryq kórýi búkil qoǵamymyz úshin jáne bir ózekti oqiǵa bolǵany belgili. Kópten kútken osynaý qujat elimizdiń damýyn, ultymyzdyń órkeniet tórine shyǵý joldaryn aiqyndap bergen shyn mánindegi rýhani baǵdarlama. Búginde maqaladaǵy qaǵidalar men talaptardy iske asyrý boiynsha kóptegen jumystar júrgizilip jatyr. Sondyqtan, bul baǵdarlama bizge áli kóp ýaqyt maǵynaly qyzmet etetin asa mańyzdy baǵyt bolyp qalmaq, – dedi Ǵosman Tóleǵul.
Maqalada avtordyń tarihi bolmysymyzdyń basty qyry retinde aldyńǵy orynǵa «Atqa miný mádenietin» qoiýynda úlken mán bar. Bizdiń ertedegi ata-babalarymyzdyń budan alty myń jyldai buryn planetada alǵash jylqy malyn qolǵa úiretkendigi búginde ǵylymi dáleldengen derek. Atqa miný mádenieti men jylqy sharýashylyǵy jer júzine Uly daladan taraǵany tarihtan belgili. Bul qazaq halqynyń tamyry óte tereńde ekendigin, tegi asyl ekendigin bildiredi, sol asyldyqty endigi jerde jasampazdyqtyń, órkenietti álemniń biiginen laiyqty oryn alýdyń negizi etý qajettigin megzeidi.
Baiandamashydan keiin sóz alǵan Astrahan aýdany ákiminiń orynbasary Janar Shahputova seminarǵa qatysýshylardy búgingi kúni aýdan belsendileriniń atalǵan maqalanyń qaǵidalaryn júzege asyrý barysynda júrgizip jatqan keleli isterine jan-jaqty toqtaldy.
Jaryssózge shyqqan Bulandy aýdandyq ardagerler keńesiniń tóraiymy Kúlán Seidahmetova, Esil aýdandyq ardagerler keńesiniń tóraǵasy Serǵali Úsipov aýdandyq ardagerler keńesteriniń Elbasynyń «Uly dalanyń jeti qyry» maqalasyndaǵy qaǵidalardy ómirsheń etýde ardagerlerdiń tyndyryp jatqan abyroily jumystaryn atap ótti.
Seminar jumysynyń sońynda sóz alǵan respýblikalyq ardagerler uiymy Ortalyq Keńesi tóraǵasynyń birinshi orynbasary, akademik Ómirzaq Ozǵanbaev «Uly dalanyń jeti qyry» maqalasynyń qyry men syryna tereńirek úńildi.
Elbasy maqalasynyń jariialanǵanyna edáýir ýaqyt ótti. Halyqtyń búkil toptary, barsha ardagerler qaýymy onymen negizinen tolyq tanysty deýge bolady. Endigi másele osynaý mańyzdy qujattyń tereń mánin ár zamandasymyzdyń kókeiine jetkize berý qajet, bul turǵyda úlken ideologiialyq jumys júrip jatyr, ony jalǵastyra berý kerek.
Avtor atap kórsetkenindei, bizdiń ata-babalarymyz tirshiliktiń qaisybir salasynda bolmasyn ózindik iz-tańbalaryn qaldyrdy. Máselen, oiýlap keskindeýdi, metalmen jumys isteýdiń tehnikasyn, quimalar quiýdyń, jaima altyn daiyndaýdyń kúrdeli ádisterin jaqsy meńgergen. Ata-babalarymyzdyń ǵalamat murasyn jańǵyrta otyryp, ony endigi uly isterdiń irgetasy etýdiń mańyzy zor.
Jaryssózde óz oiyn odan ári jaǵastyrǵan ardager akademik osy ýaqytqa deiin Aqmola oblystyq ardagerler uiymynda bul turǵyda birshama jumystar atqarylǵanyna jáne kelesi jyly atalyp ótiletin Uly Jeńistiń 75 jyldyq torqaly toiyna ázirlik jumystary júrgizilip jatqandyǵyna basa nazar aýdardy.
Tóralqa músheleri, qatysýshylar jáne aýdandyq, qalalyq ardagerler keńesteriniń ókilderi Uly Otan soǵysynda qaza tapqan jaýyngerlerge qoiylǵan eskertkishke gúl shoqtaryn qoidy, sodan keiin dene shynyqtyrý-saýyqtyrý kesheniniń jáne shyǵarmashylyq úiindegi aýdandyq mýzeidiń jumysymen tanysyp, «Rýhani jańǵyrý» sheńberindegi kitap kórmesinde boldy.
Shara sońy aýdandyq kórkemónerpazdar úiirmesine qatysýshy ardagerlerdiń soǵys jyldaryndaǵy ánder men qazirgi zamannyń áýenderin tamashalaýǵa ulasty.
Úkitai AHMADEEV,
oblystyq ardagerler keńesiniń jaýapty hatshysy.
