Búgin elordasy Astanada Ulttyq sport túrlerinen Respýblikalyq «Uly dala rýhy» festivaliniń toǵyzqumalaq, asyq atý oiyndary men qazaq kúresinen finaldyq jarystary ótti. Buǵan deiin festivaldiń irikteý kezeńine 700-ge jýyq sportshy qatyssa, «Dáýlet» sport keshenindegi finaldyq saiystar asyq atýshylardyń oiynymen bastalǵan bolatyn.
Asyq atý sport túrinen jastar arasyndaǵy komandalyq esepte QR chempionatynyń jeńimpazdary men halyqaralyq «Altyn saqa» týrniriniń chempiondary sanalatyn Asanqul Nurbek, Bulanbai Aslan, Myńtóre Nurbaqyttardyń búgingi saiysta joly bolmady. Olar finalda 2:3 esebeimen Jambyl oblysynan kelgen asyq atýshylarǵa jol berse, aqtóbelikterdi 4:1 esebimen qapy qaldyrǵan shyǵysqazaqstandyq órender júldeli III orynǵa ie boldy.
Budan keiin festival bileginen góri miyna kóp kúsh túsiretin toǵyzqumalaqshylardyń saiysyna ulasty. Toǵyzqumalaqtan Aziia jáne QR chempionattarynyń jeńimpazdary men júldegerleri Eserkep Qundyz, Súleimenov Nursultan, Batyrbek Beibarys pen Abai Dianalar qatysqan jarysta Kereký óńirinen kelgen sportshylardyń baǵy janyp, komandalyq esepte bas júldeni ielendi. Finaldyq oiyndarda pavlodarlyq komanda elordalyqtardan basym tússe (jalpy esep 4:2), joǵaryda aty atalǵan Qundyz ben Diananyń júzdesýinde Diana aiqyn jeńiske jetken edi. Al, Atyraýdan kelgen toǵyzqumalaqshylar Túrkistan oblysynyń sportshylaryna tótep bere almai, 4-shi oryndy mise tutty, qorytyndy esep – 2:4. Jeńis tuǵyryna kóterilgen asyq atýshylar men toǵyzqumalaqshylar komandalary aqshalai júldemen marapattaldy. Atap aitqanda, I oryn – 600 myń, II oryn – 400 myń, III oryn – 200 myń jáne IV oryn ielerine 100 myń teńge tabystaldy.
Festivaldiń alǵashqy jarys kúnin qazaq kúresiniń balýandary túiindedi. Tórt oblystyń, iaǵni, Túrkistan, ShQO, Atyraý oblysy men Astana qalasynyń namysyn qorǵaǵan bahadúrler bozkilemde bel ketkenshe kúresti. Aldymen, 8 salmaq dárejesinde Túrkistan oblysynyń balýandary «bozkilem ieleri» shyǵysqazaqstandyq balýandardy 5:3 esebimen tize búktirse, 4:4 esebeimen teń túsken atyraýlyqtar men «bozkilem ieleriniń» tartysty kezdesýleriniń qorytyndysynda tóreshiler batystan kelgen balýandardyń baby basym boldy degen sheshim shyǵardy. Dál osyndai esep III oryn úshin ótken ShQO men Astana qalasynyń balýandarynyń arasynda ótken jekpe-jekterdiń sońynda tirkelse, bul joly da tóreshiler elordalyq balýandardy jeńiske laiyq dep tappady. Al, finalda Túrkistan men Atyraý oblysynyń balýandary beldesip, komandalyq jarys nátijesinde 7:1 esebimen ońtústikten kelgen apaitós jigitter kúmánsiz jeńiske jetti. Sóitip, Astana qalasynyń 20 jyldyǵyna orai alǵash ret respýlika kóleminde uiymdastyrylǵan «Uly Dala rýhy» festivalinde top jarǵan túrkistandyq balýandar 1 500 000 teńgeni qanjyǵalaryna bailasa, Atyraý oblysynyń sportshylary 800 myń teńgeni ielendi. Júldeli III oryn alǵan shyǵysqazaqstandyq balýandarǵa 600 myń teńge tabystalsa, elordalyqtarǵa 200 myń teńge aqshalai syilyq buiyrdy.
QR Mádeniet jáne sport ministrligi men Ulttyq jáne at sporty túrleri ortalyǵy uiymdastyrǵan festival erteń «Qazanat» atshabarynda 16 qyrkúiekke deiin jalǵasady. Festival aiasynda Astana qalasynyń turǵyndary men qonaqtary teńge ilý, jamby atý, aýdaryspaq, alaman báige jáne kókpar oiyndaryn tamashalai alady.
Ult-aqparat
