Almatyda Qazaqstan musylmandary dini basqarmasynyń uiymdastyrýymen Qazaq memlekettik qyzdar pedagogikalyq ýniversitetinde «Ultyńdy saqtaimyn deseń, qyzyńdy tárbiele» taqyrybynda dóńgelek ústel ótti. Basty pikir almasýlar jastarǵa islami, imani tárbie berý, ulttyq minez, ulttyq sana sezim qalyptastyrý tóńireginde órbidi.
Dóńgelek ústel jumysyna Bekjan Turys jetekshilik etip, spiker retinde Qazaqstan Musylmandary dini basqarmasynyń tóraǵasy, Bas múfti, Erjan qajy Malǵajyuly, Qazaq memlekettik qyzdar pedagogikalyq ýniversitetiniń birinshi prorektory Bahodir Aliev, Almaty qalasy boiynsha ókil imam Nurbek qajy Esmaǵanbet, Almaly aýdany jáne «Tóle bi» meshitiniń bas imamy K. Myrzabai, Baýyrjan Momyshulynyń kelini Zeinep Ahmetova, til janashyry Asyly Osmanova t.b. qatysty.
Kezdesýde Dini basqarmanyń osy ýaqytqa deiin atqarǵan jumysy jáne jastar máselesine bailanysty júzege asyrylyp jatqan jumystar jóninde videorolik kórsetilip, Bas múfti jastarmen pikir almasty. Pikir almasý barysynda jastar erkin oi bildirip, tolǵandyryp júrgen dini máselelerge jaýap aldy.
Sonymen qatar, shara barysynda XIV-XIX ǵasyrlardyń kóne dini qoljazbalary men qazaq ómirin beineleitin sýretter kórmege qoiyldy.
Erjan qajy MALǴAJYULY, Qazaqstan Musylmandary dini basqarmasynyń tóraǵasy, Bas múfti:
MAQSATYMYZ – TARIHYMYZDAǴY BATYR, IBALY QYZDARYMYZDY JASTAR ARASYNDA NASIHATTAÝ.
— Dini basqarma 2016 jyldy «Din jáne tarih taǵylymy» dep jariialady. Maqsatymyz – tarihymyzdaǵy talai batyr qyzdarymyzdy, ibaly qyzdarymyzdy, ultymyzdyń damýyna úles qosqan analarymyzdy jastar arasynda nasihattaý. Kúrdeli aqparattyq ýaqytta tárbie berý, imandylyq pen ulttyq negizde júieleýdi qajet etedi. Sandyqtan, dástúrli Islami ilim men ulttyq sipatymyzdy jastar boiyna sińire alsaq, onyń qoǵamǵa ákeler paidasy ushan teńiz. Jastar máselesin qozǵaǵanda qaitadan sol tárbieni, imandylyqty, izgilik pen senimdi taǵy sóz etemiz. Asyl qasietterdi erteńgi el ieleriniń boiyna qalyptastyrý, qyz tárbiesin imandylyqpen bailanystyrý arqyly ǵana sheshiledi.
Zeinep AHMETOVA, Baýyrjan Momyshulynyń kelini:
QYZ TÁRBIELI BOLMAI – ULT TÁRBIELI BOLMAIDY
— Tárbieniń ózi imandylyq. Qyz tárbieli bolmai – ult tárbieli bolmaidy. Bala kezinde ulttyq tárbiemen sýsyndaǵan qyz bala boijetkende de sol ádebin saqtaidy. Salt-dástúrdi úiretýdiń negizgi maqsaty — qyzǵa ana bolýdy, shańyraqtyń qut-berekesi ekenin uǵyndyrý. Qyz balanyń myna ómirdegi mindet-paryzynyń júgi aýyr, ári ardaqty. Ol — adamzat urpaǵyn ómirge ákeletin bolashaq ana, úi ustap, jar kútetin adal jar, ata-ene syilaityn qamqor kelin. Bul — ómir zańy.
Aigúl ISMAQOVA, filologiia ǵylymdarynyń doktory, professor:
QAZAQ QYZY URPAQ TÁRBIEShISI RETINDE DINNIŃ RÝHANI NEGIZDERIN TEREŃIREK ZERTTEP BILÝI QAJET.
— Oishyl Abai: «Allanyń ózi de ras, sózi de ras» degen. Al, Abaidy álemge tanytqan alash azamattarynyń bári saýatyn medireseden ashqan. Sol arystarymyz bes ýaqyt namazyn jasyrynyp júrip oqyp, elge qyzmet etken edi. «Halyqqa qyzmet etý imannan» degen ustanymdy is júzine asyrǵan solar bolatyn. Qazirgi ýaqytta jái ǵana musylman bolý jetkiliksiz. Sondyqtan, qazaq qyzdary bir otbasynyń anasy, urpaqtyń tárbieshisi retinde dinniń rýhani negizderin tereńirek zerttep bilýi qajet.
QMDB baspasóz qyzmeti
