QR Ulttyq ulannyń «5517 áskeri bólimi» RMM-niń laýazymdy birqatar tulǵasy para alǵany úshin sottaldy. Bul týraly "Ult aqparat" Agenttiktiń baspasóz qyzmetine silteme jasap habarlaidy.
«Batys Qazaqstan oblysynyń sybailas jemqorlyqqa qarsy qyzmeti QR Ulttyq ulanynyń «5517 áskeri bólimi» RMM bólim komandiriniń tyl jónindegi orynbasary maior J.M.Omarovqa jáne atalǵan RMM-niń kiim-keshek qyzmeti bóliminiń bastyǵy leitenant T.B. Qydyrovqa qatysty para alý faktisi boiynsha sotqa deiingi tergeýdi aiaqtady. Olar jeke kompaniia direktorynan oryndalǵan jumystar aktilerine kedergisiz qol qoiǵany jáne aldaǵy ýaqytta da kórsetetin kómegi úshin 300 myń teńge kóleminde para aldy degen kúdikke ilingen bolatyn», - delingen habarlamada.
Aǵymdaǵy jyldyń 7 qazanynda Aqtóbe garnizony áskeri sotynyń úkimimen Omarov para alǵany úshin kináli dep tanylyp, 7 jyl 2 ai merzimge bas bostandyǵynan aiyryldy. Al Qydyrovqa 6 mln teńge somasynda aiyppul tóleý jazasy belgilendi.
Sottalǵandar memlekettik qyzmette qyzmet atqarý quqyǵynan, sondai-aq áskeri ataqtarynan ómir boiyna aiyryldy.
