Ótken demalys kúnderi Tarazda Ulttyq ulan sarbazdary qalada jan-jaǵyna pyshaq siltep, jurttyń mazasyn alǵan buzaqyny ustady, dep habarlaidy "Ult aqparat" «Ońtústik» óńirlik qolbasshylyǵynyń baspasóz qyzmetine silteme jasap.
Oqiǵa 8 tamyzda bolǵan. Qoǵamdyq tártip pen qaýipsizdikti kúzetý boiynsha patrýlde júrgen Ulttyq ulannyń 5513 áskeri bóliminiń áskeri jasaǵy Nietqaliev kóshesinen júrisi kúdik týdyrǵan er adamdy baiqaidy. Tártip saqshylaryn baiqaǵan kúdikti qasha jóneldi. Áskeri jasaq boiynsha kezekshi aǵa leitenant Sanat Halmaqan patrýldermen birge kúdiktiniń sońyna túsedi.
«Biz qala turǵynynyń áreketinen kúdiktengen soń birden soǵan qarai bardyq. Ol bizden qashyp baryp, kósheniń qiylysyna toqtap, qaltasynan pyshaq shyǵaryp jan-jaǵyna retsiz siltei bastady. Ózine eshkimniń jaqyndamaýyn talap etip aiqailady. Biz dereý ol azamatty qolǵa túsirý úshin áreket jasadyq, sebebi ol ainalasyna qaýip tóndirdi. Jekpe-jek urysynyń ádisterin paidalaný arqyly biz ony ustadyq», - deidi qatardaǵy jaýynger Merei Ótelbaev.
Kúdiktini ustaǵan jerge Taraz qalasynyń Politsiia basqarmasynan jedel-tergeý toby shaqyryldy. Ustalǵan adam Taraz qalasynyń buryn sottalǵan 26 jastaǵy turǵyny ekeni anyqtaldy.
