Foto: Stan.kz
Ulttyq ulan Bas qolbasshysynyń tehnika jáne qarý-jaraq jónindegi orynbasary Konstantin Voronkin ustaldy, dep habarlaidy "Ult aqparat" Ishki ister ministrligine silteme jasap.
"Ishki ister ministrligi Ulttyq ulan Bas qolbasshysy orynbasarynyń zańsyz áreket jasady degen kúdikpen ustalǵanyn rastaidy. Qazirgi ýaqytta quzyrly organdar Ishki ister ministrligimen birlese tergeý amaldaryn júrgizip jatyr. Ministrlik óz qataryndaǵy sybailas jemqorlyqtyń kez kelgen kórinisterine tózbeýshilik týraly óziniń printsipti ustanymyn bildiredi. Osyǵan bailanysty qoldanystaǵy zańnama sheńberinde obektivti jáne jan-jaqty tergeý júrgiziledi", – delingen habarlamada.
Ulttyq ulannyń saitynda, Konstantin Voronkinniń Ulttyq ulan bas qolbasshysynyń tehnika men qarý-jaraq jónindegi orynbasary ekeni jazylǵan. Ol bul qyzmetke 2020 jyldyń 24 qarashasynda taǵaiyndalǵan. Ol Shymkent qalasynda týǵan, 53 jasta.
Ózbek Sotsialistik Keńestik Respýblikasy Joǵarǵy Keńesi atyndaǵy Samarqand joǵary áskeri avtokólik komandalyq ýchilishesin, Qazaqstan Respýblikasynyń Tuńǵysh Prezidenti – Elbasy atyndaǵy Ulttyq qorǵanys ýniversitetin, Resei Federatsiiasy Qarýly Kúshteri Bas shtaby Akademiiasynyń joǵary akademiialyq kýrstaryn aiaqtaǵan.
2020 jyldyń 24 qarashasynan bastap Ulttyq ulan Bas qolbasshysynyń tehnika jáne qarý-jaraq jónindegi orynbasary qyzmetin atqaryp kelgen.
Aita keteiik, buǵan deiin Almaty oblysy Ile aýdanynyń ákimi Baǵdat Qarasaevtyń ustalǵany habarlanǵan edi. Almaty oblystyq prokýratýranyń habarlaýynsha, Ile aýdanyndaǵy qoqys poligonyn tekserý kezinde ákim sybailas jemqorlyqqa qatysy bar degen kúdikke ilingen.
