Parlament Senatynyń jalpy otyrysynda «Tehnikalyq retteý týraly» Zańy qabyldandy, dep habarlaidy "Ult aqparat".
«Biylǵy 24 qańtarda ótken Úkimettiń keńeitilgen otyrysynda jáne 1 qyrkúiektegi Qazaqstan halqyna arnalǵan Joldaýynda Memleket basshysy on jyldan astam ýaqyt buryn qabyldanǵan tehnikalyq retteý týraly zańnama qazirgi ýaqyttyń talaptaryna sai kelmeitinin atap ótip, ónimniń qaýipsizdigi men sapasyn arttyrý jóninde naqty tapsyrmalar berdi.
Saýda jáne integratsiia ministri Baqyt Sultanovtyń aitýynsha, óz naryǵymyzdy qorǵaý úshin iri álemdik ekonomikanyń saýda teketiresi jaǵdaiynda ekonomikany «ilgeriletetin» júieli faktorlar bar, olarǵa da den qoiý qajet.
Olardyń ishinde:
1) ishki jáne syrtqy naryqtardaǵy tutynýshylardyń tarapynan otandyq taýarlardyń sapasy men qaýipsizdigine talaptardyń kúsheiýi;
2) importtyq taýarlar tarapynan «qysym» jáne eksporttyń jańa naryqtaryna shyǵý;
3) integratsiialyq protsesterdi tereńdetý.
«Osyǵan bailanysty jáne atalǵan kemshilikterdi júieli túrde sheshý úshin Úkimet tehnikalyq retteý týraly zańnyń jańa redaktsiiasyndaǵy jobasyn ázirlep, Parlamenttiń qabyldaýyna usyndy. Zań jobasyn ázirleý kezinde bizdiń negizgi mindetimiz tutynýshylardy qaýipti ónimnen qorǵap qana qoimai, baqylaý is-sharalaryn júzege asyrý kezinde olarǵa artyq júkteme kórsetpei, otandyq taýar óndirýshilerdi qoldaý tetikterin engize alatyn jańa normativtik bazasyn qurý boldy», - dedi ministr.
Osy oraida B. Sultanov zań jobasynyń negizgi erejelerine toqtaldy.
Birinshi – memlekettik baqylaý kezinde jedel den qoiý tetigin engizý. Bul máseledegi zańnamalyq jańalyq – sýbektilerdiń baqylaýynan obektilerdiń baqylaýyna kóshý. Iaǵni óndirýshi nemese satýshy emes, ónimniń ózi tekseriletin bolady. Ol úshin zerthanalarda synaq júrgizý úshin adam ómirine qaýipti ónim úlgilerin satyp alý rásimderi engiziledi.
Qaýipti ónimniń otandyq naryqtaǵy ainalymynyń shuǵyl jolyn kesý maqsatynda zań jobasynda Kásipkerlik Kodekske sáikes jedel den qoiýdyń eki sharasy kózdeledi.
«Bul rastalǵan synaqtardyń nátijeleri boiynsha qaýipti ónimdi alyp qoiý jáne sertifikattaýdan ótpegen nemese sertifikaty joq ónimdi ainalymǵa shyǵarýǵa tyiym salý. Bul rette zań jobasy jappai baqylaýdy kózdemeidi. Obektiler aqparattyq bazada «onlain» rejimde qadaǵalanatyn bolady. Jedel den qoiý sharalary bultartpaityn dálelder bolǵan kezde ǵana qoldanylatyn bolady, al ónimdi ainalymǵa shyǵarýǵa tyiym salý anyqtalǵan zań buzýshylyqtar joiylǵanǵa deiin qoldanylady», - dedi vedomstvo basshysy.
Ekinshiden, sáikestikti baǵalaý rásimderin jetildirý, sertifikattaý protsesterin tsifrlandyrý eskerilgen.
Úshinshiden, salalardaǵy tehnikalyq retteýdi kúsheitý qarastyrylǵan.
Eýraziialyq ekonomikalyq odaq aiasynda kelissózder pozitsiiasyn sapaly qalyptastyrý maqsatynda salalyq memlekettik organdar janynda Saraptamalyq keńester qyzmetin qaita qurý kózdelýde.
Ulttyq tehnikalyq reglamentterdi ázirleýdiń tártibi qaita qaralady.
Biznes úshin erikti sertifikattaý júiesin qurýdyń quqyqtyq tetigi belgilenedi.
«Qazaqstanda tiisti zerthanalyq praktikany damytý máselesine asa kóńil bólinedi. Bul Ekonomiqalyq yntymastyq jáne damý uiymy (EYDU) elderinde qazaqstandyq synaq hattamalaryn tanýǵa serpin beredi.
Atalǵan normalar qazaqstandyq taýarlardy syrtqy naryqqa shyǵarýǵa, otandyq óndirýshilerdiń básekelestik artyqshylyǵyn jáne Qazaqstanǵa tiimdi pozitsiialardy kásibi túrde qorǵaýǵa baǵyttalǵan», - dedi Baqyt Sultanov.
Sonymen qatar, Senattyń jalpy otyrysynda «Qazaqstan Respýblikasynyń keibir zańnamalyq aktilerine tehnikalyq retteý, kásipkerlik, memlekettik basqarý júiesin jetildirý jáne tólemder máseleleri boiynsha ózgerister men tolyqtyrýlar engizý týraly» Zańy eki oqylymda qaralyp, qabyldandy.
