Foto: Akorda.kz
Prezident Qasym-Jomart Toqaev Ulttyq quryltaidyń úshinshi otyrysynda sóilegen sózinde el tutastyǵynyń ziialy qaýym birliginen bastalatynyn aitty dep habarlaidy "Ult Aqparat" QazAqparatqa silteme jasap.
«Men byltyr kúzdegi Joldaýymda Jańa ekonomikalyq saiasatqa kóshetinimizdi aittym. Aqpannyń basynda Úkimet aýysty, jańa mindetter júkteldi. Degenmen, naǵyz damyǵan el bolý úshin tek ekonomikalyq maqsat qoiý jetkiliksiz. Áleýmettik, sharýashylyq, ideologiialyq jáne basqa da salalardaǵy baǵdarymyzdy aiqyndap, naqty sharalardy qolǵa alýymyz kerek. Sondyqtan biyl Ulttyq quryltaidy jyldaǵydai jazda emes, erterek ótkizip otyrmyz. Osy oraida, birqatar ózekti máselege arnaiy toqtalǵym keledi.
Eń aldymen, halyqtyń bereke-birligin saqtaý eldigimiz úshin asa mańyzdy. Bul týraly únemi aityp júrgenimdi bilesizder. Yntymaǵy jarasqan, ortaq maqsatqa uiysqan ult eshqashan utylmaidy. Eshteńeden qur qalmaidy. Bul iste ziialy qaýym airyqsha ról atqarady. Ásirese, elge sózi ótetin aǵa býynnyń orny bólek. Olar – qazaqtyń qaimaǵy, ulttyń maqtanyshy.
Eldiń tutastyǵy ziialy qaýymnyń birliginen bastalady. Iaǵni, aldymen el aǵalarynyń arasynda aýyzbirshilik bolýy kerek. Olar urpaqqa ónege bolatyn kesek áńgime aitýy qajet», - dedi Memleket basshysy.
Prezident sondai-aq kórnekti tulǵalar birin-biri moiyndap, ózara qurmet kórsete bilse, ultymyz uiysa túsetinin jetkizdi.
«Jazýshylar Odaǵynyń tóraǵasy, Ulttyq Quryltaidyń múshesi Mereke Qulkenov jaqynda osy másele týraly oryndy pikir bildirdi. Halqymyzdyń kórnekti tulǵalary birin-biri moiyndap, ózara qurmet kórsete bilse, ultymyz uiysa túsedi dep aitty. Qazir ertede ótken oqiǵalarǵa, belgili bir tulǵalarǵa qatysty talqylaý kóbeiip barady. Qalamgerlerimiz, tipti, Shyńǵys hannyń tegi kim dep, aitysyp-tartysyp jatatyn boldy. Keńes zamanyndaǵy tulǵalardy, ásirese, Alash kósemderi men Keńes qairatkerlerin salystyryp, bir-birine qarsy qoiady. Dál osyndai sóz tartystarynyń aqiqatyna jetý qiyn, jetkenniń ózinde el ishine iritki salatyn mundai daý-damaidyń esh qajeti joq. Ár dáýirdiń óz ereksheligi bar. Árbir tulǵa óziniń kózqarasyna, dúnietanymyna qarai jáne óz qoǵamynyń múddesine sáikes elge qyzmet etti. Olar, iaǵni, sol zamannyń qairatkerleri bir kezderi ustanǵan baǵytyna bola daýlassa, endigi urpaq kimniń isi durys, kimdiki burys dep daýryǵyp júr. Jalpy burynǵy jáne qazirgi tarihtyń túrli kezeńderin, tulǵalaryn bir-birine qarsy qoiýǵa bolmaidy. Túptep kelgende, munyń bári – bizdiń tarihymyz. Bul – halqymyzdyń júrip ótken joly. Sol sebepti, qalai desek te, tarihymyzǵa shynaiy kózben qarap, ony sol qalpynda qabyldaýymyz kerek. Ult jylnamasy eldi biriktiretin faktor bolýǵa tiis», - dep atap ótti Prezident.Qasym-Jomart Toqaev tarihqa kelgende kóbinese emotsiiaǵa berilip ketetinimizdi tilge tiek etti. Ótken zamandy orynsyz qazbalaý jaqsylyq ákelmeitinin, onyń paidasynan góri, ziiany kóp ekenin aitty.
«Óspeitin eldiń balasy ónbeitin daýdy qýady» dep beker aitpaǵan. Ótken is ótti, endi ony eshkim ózgerte almaidy. Ýaqyt eń ádil tóreshi ekenin umytpaiyq. Bizge bitpeitin daý-damai emes, myzǵymas yntymaq pen birlik kerek. Qazirgi tarihi kezeńde halqymyzdyń sózi de, isi de – bir bolýy qajet. Sondyqtan ziialy qaýym, eń aldymen, elimizdiń birligin nyǵaitýǵa basa nazar aýdarǵany jón. Aǵa býyn jas urpaqqa jol nusqap, baǵyt-baǵdar berýi kerek. Elimizde kózi ashyq, kókiregi oiaý, oiy ushqyr, bilimdi jastar kóp. Biz olardyń boiyna asyl qasietterdi sińirýimiz qajet. Uly Abaidyń «Birińdi qazaq, biriń dos, kórmeseń, istiń bári – bos» degen sózi áli de ózekti bolyp tur. Men ziialy qaýym ókilderiniń bir-birine árdaiym tilektes bolǵanyn qalaimyn. Ózara janashyr bolý, túptep kelgende, elge janashyr bolý degen sóz. Taǵy da qaitalap aitqym keledi: usaq-túiek áńgimeni qoiý qajet. Qazaqty bólip-jarýǵa bolmaidy. Biz jalpyulttyq deńgeide oilaýǵa umtylýymyz kerek», - dedi Prezident.
