Ulttyq Olimpiada komiteti bas assambleiasynyń otyrysynda komitettiń bas hatshysy Andrei Kriýkov kásibi sport klýbtary qarajatyn jas býynnyń daiyndyǵyna baǵyttaý kerektigin aitty, dep habarlaidy QazAqparat.
«Sport rezervin daiyndaý júiesi eldiń sporttaǵy jetistigin aiqyndaitynyn kórdik. Ulttyq qurama komandalar jańa býynmen úzdiksiz tolyǵyp otyrýy kerek. Jas sportshylardyń yntasy bolmaýy olardyń sportty erte aiaqtaýyna ákelýi múmkin. Ulttyq qurama komandalardy daiyndaý isinde rezervtik daiyndyqty qaita quryp, kúsheitý basym baǵyt bolýy kerek. Ulttyq olimpiada komiteti rezerv daiyndaýmen ainalyspaitynyn aitqym keledi», - degen komitettiń bas hatshysy sońǵy 3 jylda ulttyq quramalardyń qarajaty qysqarǵanyn synǵa aldy.
«Qarjylandyrýdyń qysqarýy da keri áserin tigizdi. Qazirgi sport qarjylandyrý máselesinde júielilikti qajet etedi. Ulttyq qurama komandalardyń kóshbasshylaryn daiyndaýǵa qarastyrylǵan qarajatty 2018-2021 jyldar aralyǵynda 90 paiyz kemitý sportshylar men bapkerler personalynyń yntasyn túsirip, daiyndyqty turalatty. Kúres, boks, dziýdo, aýyr atletika jáne basqa da jetekshi sport túrleriniń qarjysyn Rio oiyndarynan keiin qysqartý Tokiodaǵy sátsizdikterdiń negizgi sebepteriniń biri boldy. Rioda utyp alǵan 18 medaldiń 16-syn jeke baǵdarlama boiynsha jattyqqan sportshylar alǵan bolatyn», - dedi Andrei Kriýkov.
Sondai-aq, ol ultttyq quramalardyń sapaly daiyndyǵyna qajet aqshanyń naqty shyǵyny qazirgi qarjylandyrý kóleminen áldeqaida kóp ekenin atady.
«Jergilikti biýdjetterdiń sportqa bóletin qarajatyn eskersek, ulttyq qurama komandalardyń memleket tarapynan qarjylandyrylýy sportqa jumsalatyn jalpy shyǵynnyń 6 paiyzyn ǵana quraidy. Muny iri kásibi fýtbol klýbtarynyń qarjylandyrýymen salystyrp kóreiik. Bizdiń oiymyzsha, bul - oiǵa qonymsyz. Sport klýbtary 50 adamdy qarjylandyratyn aqshaǵa ulttyq quramanyń 1300 adamyn qarjylandyryp otyrmyz. Sondyqtan, bizdiń bul jerdegi ustanymymyz aiqyn. Kásibi klýbtardyń biýdjetin qaita qarap, bosaǵan qarjyny balalar-jasóspirimder sportyna berýdi qoldaimyz. Olimpiada sportshylarynyń jetistigi árdaiym óskeleń urpaqqa úlgi bolyp otyrady. Al kásibi klýbtardaǵy aty belgisiz legionerler ondai úlgi kórsete almaidy. Biraq solarǵa qarajattyń aýqymdy bóligi ketip jatyr», - dedi UOK bas hatshysy.
