© Foto: ©️ Tengrinews.kz / Turar Qazanǵapov
Májiliste Ulttyq qordan balalarǵa beriletin tólemder týraly zań jobasy talqylandy, - dep habarlaidy Tengrinews.kz saity.
Májilistiń otyrysynda Zańnama jáne sot-quqyqtyq reforma komitetiniń múshesi Únzila Shapaq balalarǵa Ulttyq qordan tólenetin tólem máseleleri boiynsha baiandama jasady. Osydan keiin depýtat Murat Ergeshbaev áriptesinen kámelettik jasqa tolmaǵan balalardyń qarajat alý máselesi qalai sheshiletinin surady.
"Zań jobasyna sáikes, Qazaqstan azamattary kámeletke tolǵan kezde turmys jaǵdaiyn jaqsartý jáne bilim alý úshin Ulttyq qordan qarajat ala alady. Alaida jobada keibir máseleler qarastyrylmaǵan. Máselen, 18 jasty kútpei, bala 16 jasynda 9-synypty bitirip kolledjge tússe qarajat alý máselesi qalai sheshiledi" - dep surady Murat Ergeshbaev.
Únzila Shapaq keibir máseleler áli de talqylanyp jatqandyǵyn aitty. Oqý-aǵartý vitse-ministri Edil Ospan qazir ondai qajettilik joq dep jaýap berdi.
"Búgingi tańda 9-synyptan keiin balalardy kolledjderge qabyldaý úshin memlekettik granttar bólinedi, memlekettik jospar bar, qazir bizde eshqandai qajettilik joq. Osy zań jobasy aiasynda bilim alý normalary úshin biz talqylaýǵa daiynbyz", - dep jaýap berdi Edil Ospan.
Májilis spikeri Erlan Qoshanov: "Siz 18 jasqa deiin qarajatty qoldanýǵa bolmaidy dep aitqyńyz keledi me?", - dep naqtylady.
Oqý-aǵartý vitse-ministri: "Iá, 18 jasqa deiin aqsha qajet emes, olar tegin qamtamasyz etiledi" - dep jaýap berdi.
Osy rette májilismen Erkin Ábil zań jobasynda 1-2-shi toptaǵy múgedek balalardyń kámeletke tolǵanyn kútpei-aq qajet bolǵan jaǵdaida jinaq aqshasyn paidalaný múmkindigi nege qarastyrylmaǵanyn surady.
"Bizdiń eki maqsatymyz bar: ómir súrý jaǵdaiyn jaqsartýǵa jáne bilim alýǵa múmkindik berý. Keibir balalarda týǵannan der kezinde aralasýdy jáne tiisinshe erte emdelýdi qajet etetin kóptegen aýrýlar bar ekenin atap aitqan jón. Biz qajet bolǵan jaǵdaida, jeke esep shottarynda jinaqtalǵan qarajat esebinen mundai balalardyń tez arada emdelýine nege múmkindik bere almaimyz?" - dep surady Erkin Ábil.
Únzila Shapaqtyń aitýynsha, bul tásilmen máselelerdi sheshýde kúmán bar.
"Erekshe qajettilikteri bar balalar úshin bul qarajat kez kelgen ýaqytta qajet. Degenmen, tólemderdi jibergen kezde másele tolyǵymen sheshiletinine kúmánimiz bar. Mundai balalar az, biraq qarsy taraptyń quqyqtarynyń ustanymy árqashan bolýy kerek. Eń úlken qorqynyshtyń biri Qazaqstannan shetelge emdelýge jiberemiz, sol ýaqytta aqsha jetpei qalsa, bizdiń qandai kepildikterimiz bar? Emdeý bastalady biraq esh nátije ákelmeidi. Bul máseleni taǵy talqylaimyz", - dep jaýap berdi Únzila Shapaq.
